«Лемковина Ультра Трейль» – фільм, котрий притігат

Найліпший з гірскых маратонів в літаню на териториі Польщы, котрий рік-по-рік проходит на Лемковині, то змаганя знаны під назвом Лемковина Ультра Трейль. І хоц зацікавлены оном дисципліном та выступуючы в маратоні сут уж по тогорічных змаганях (проходили в днях 21.-23.10), орґанізаторы не перестали на тым і уж берут ся помаленькы до орґанізациі дальшой, четвертой едициі Лемковины Ультра Трейль. А найліпша то подія в своім роді, прото же выграла першы місця в загальнопольскым плебісциті гірскых маратоні аж в трьох катеґориях.

Як пристало на добрий піар, котрий все дописує змаганям, з той причыны же в маратоні чысленно берут участ професийональны і непрофесийональны спортовці, дозвалят орґанізаторам експериментувати. Іде ім тото добрі, бо в ціли промоциі подіі рішыли зрыхтувати паруминтовий фільм, котрий не лем вказує на ядро маратону, полігаюче на тяжкым фізичным высилку, але тіж обернули ся они в сторону місця, в котрым проходят змаганя. То наша Лемковина, розтягнена в шырокым пасі пілнічных Карпат, котры добрі вписуют ся в того рода подіі, вымагаючы высокых гір і дост тяжкых варунків до переміщаня ся. Но, вынятковіст самого маратону, котрий в назві має слово Лемковина, як і обшыри, на якій проходит, то не вшытко. Фільм, котрий презентуєме долов, вказує на Лемковину як цікавий світ, котрий обзераючым є оповіданий з перспективы старшой Лемкыні, од дітиньства (з перервом выгнаня) жыючой в рідным лемківскым селі.

В промоцийным фільмі змагань Лемковина Ультра Трейль уж на самым зачатку наше око притігат краса Лемковины, котра обявлят ся в виді дикой природы, жыючой своіма принципами. І власні єдном з найвекшых прикмет мараторну є тото, же проходит він часто путями, котры не сут одкрыты чловеком. Єдином особом, котра ся в фільмі выповідат, є жытелька села Вірхня (днес приналежыт до Ґладышова) – Мария Цюрик, котра доднес прожыват там, де ся народила, значыт на рідній земли. Єй выповіди сут переплітаны сценами, зниманыма вчас попередніх едиций маратону. В своім слові найстарша Лемкыня в Вірхни звертат увагу на тото, як єй рідне село, ачий ціла Лемковина змінила ся не до познаня. Є свідома, втраты того, што было колиси, чым колиси жыло село – а то радістю i щестьом. Подля ней – пропал веселий лемківскій світ…

Окрем сцен літаня учаснтиків змагань і красы нашой природы, в фільмі попозерати мож на нашу материяльну спадковину – лемківску хыжу. Видіти мож тіж деякы короткы сцены з майстерні Петра Михняка – Лемка родом з Новиці, котрий шувні продолжат ремесло вырабляня новичаньскых лжыц. Конец-кінцьом в фільмі мож почути спів лемківской пісняркы – Юлиі Дошны.

Тогорічны записы до змагань Лемковина Ультра Трейль рушают уж 12. грудня/децембра т.р. Надієме ся, же і в будучій едициі, подібні як в влонишній та тогорічній, выстартує чысленна репрезентация лемківской народности. Припомнийме, же за послідній час, наш нарід репрезентували Лемкы з чужыны, а то: Емілия Ґардоцкій, Андрий Прибыло, Павел Тутко, Кристиян Трохановскій, Петро Левкович та Катерина Трохановска і Ярослав Пласконь.

Обшырнійшы спомины Мариі Цюрик презентуєме в LEM.fmTV, публикуваны в сервісі YouTube.

фот. горі: скрін з фільму