Нове жытя дерева – выстава в Климківці

В найблизшу суботу, 10. грудня/децембра т.р., одбуде ся вернісаж выставы – Нове жытя дерева, на котрий просит Музей Дворы Карвациянів і Ґладышів – одділ Загорода Мазярска в Лоси, та Ґмінний Осередок Культуры в Ропі – одділ Сельскій Дім Культуры і Туристикы в Климківці. Сес вернісаж є підсумуваньом того, што ся діяло в рамках варштатів за цілий рік, прото вернісаж выставы буде промоцийом кумшту, котрий вытворили участникы.

На вернісаж, окрем выміненых горі орґанізаторів, щыро просит сницар Богдан Карел – Лемко родом з Лоси, котрий веде цілий проєкт. Брали в ним участ особы в ріжным віку, а серед них находят ся молоды Лемкы. Од суботы в Климківці буде мож позерати на працы Анны Цеклиняк, Томы Дошны, Ідалиі Ференц, Севастияна Качмарчыка, Матія Маґнушевского, Павла Пахлі та Барбары Засовской.

Проєкт, котрий є реалізуваний в рамках фінансовой підпоры Міністерства Культуры і Народового Дідицтва, має за головну ціль передавати плястичне знаня в обшыри традицийного артистичного ремесла, якым являт ся сницарство. Што основне, проєкт є направлений в великій мірі на підкрисляня народной сницаркы в однесіню до Лемковины і традициі східніх Церков.

Вернісаж, на котрым будут презентуваны творы, буде гейбы получыньом вельократных, попередніх варштатів і циклів стріч. Основом был народний кумшт і передаваня той обшыри артистичного знаня з мастера на ученика. Окрем веденых Богданом Карелом варштатів і заплянуваной выставы прац, єдным з пунктів проєкту є фільмова документация задачы.

Богдан Карел то артиста, котрий од тридцетьох років занимат ся сницарством, котрого таємницю познал сам, прото менує ся непрофесийональным артистом. В своій роботі головно лучыт дві пасиі: любов до материялу (дерева) та заінтересуваня канонами і духовым пізріньом на сакральны візерункы. Творит рідко хоснуваний рід рельєфів – різблены іконы. Зато і в працах його учеників, вытвореных під менторскым оком мастера, найти мож вельо повязань до церковного кумшту і деревяной артистичной спаковины Лемковины.

фото горі: єден з проведеных вартатів; джерело: сайт Музею Дворы Карвациянів і Ґладышів