В Осадным будут празднувати 90. річницю ериґуваня православной парохіі

О тыжден, в неділю, 27. листопада/новембра т.р., русиньскє село Осадне на Пряшівскій Руси буде витало двох архієреів – предстоятеля Православной Церкви Чешскых Земель і Словациі митрополиту Ростислава та сербского владыку Преосвященнійшого Атанасія. Як інфомрмує парох парохіі Вознесіня Господнього в Осадным, одвидины села архієреями православной Церкви пройдут з нагоды «90. річниці одновліня православя в Осадным». Подія тота є точно повязана і з 90. річницьом  ериґуваня православной парохіі в Осадным. Архієрейска Свята Літургія зачне ся о 9.30 год. в храмі Вознесіня Господнього, по Утрени і привитаню владык.

Процес конверсий до православя на Пряшівщыні проходил в декотрых селах о подібным часі як на Лемковині. В 1926 році жытелі Осадного задеклярували прилучыня до православной Церкви. О три рокы селяне зачали будувати православну церков попри памятнику росийскых вояків. Посвячыня церкви, котре одбыло ся в 1930 році, очелил сербскій владыка з Мукачева. В звязку з сопротивліньом товдышньой власти на побудуваня нового храму в селі, жытелі Осадного рішыли перше вознести памятник погыблым воякам вчас І Світовой Войны, котры доднес спочывают в крипті під місцевом церквом (єден з послідніх похоронів в селі одбыл ся т.р.). В крипті  находят ся мощы около 1600 росийскых вояків з часів І Світовой Войны, котры згынулы вчас неуспішной карпатской експедициі ґен. Корнилова. Храм Вознесіня Господнього будувано офіцияльно як мавзолей, але запроєктувано так, жебы міг выполняти функцию святыні. Што цікаве, в храмі находят ся деякы артефакты з неістнючой церкви в Бальници – села, котре находит ся на східній Лемковині.

Осадне то русиньскє село в окресі Снина, 17 км од польско-словацкой границі. Зо селом гейбы найбільше днес асоциює ся фільм пн. «Осадне», до котрого знимкы были зниманы в роках 2006-2009. То екранізация, вказуюча на свій спосіб почутя европейскых стремлінь Русинів, котры сут свідомы подіі, з котром неодолга приде ся ім стрітити. Бесіда о рыхтуваній стрічы лідерів европейской політикы зо старостом села Осадне – Владиславом Мікуляшком, православным парохом в Осадным – о. Петром Сороком, та Федором Віцо – культурным діячом і карикатуристом. В фільмі, окрем знимок з Европейского Парламенту, видиме сцены з сельской корчмы, похорону, крестин і яруваня поля на ґаздівці. Піднесены сут важны демоґрафічны проблемы, котры здавают ся тыкати русиньскых сел, розсіяных по цілій Карпатскій Руси. В селі находит ся тіж грекокатолицка церков з 1792 рока.

фот. горі: фейсбуковий профіль о. Петра Сорокы