У Духновіча одпремєрують Бісы

Як є звыком шторік, в децембрі Театер Александра Духновіча принесе на сцену свою другу премєру в сезоні. Премєра то в театрі буде і режісерска, бо Бісы режірує Браніслав Мазух, котрый першыраз співпрацує з нашым професіоналным театром.

На 16-го децембра є напланована премєра пєсы, котра выникла на мотівы твору єдного із російскых найвызначнішых літературных класіків. Театер тот раз принесе на професіоналну сцену Фйодора Михаіловіча Достоєвского і його Бісы. Бісы належать міджі Достоєвского остатні два великы творы, котры написав при кінцю свого жывота. По політічнім романі Бісы, котрый говорить о зничуючій силі анархізма і нігілізма, в котрім антіціпує приход соціалізма і його дослідкы, Достоєвскый написав вже лем Братів Карамазовых.

Режіровати в Театрі Александра Духновіча дістав по першый раз можливость Браніслав Мазух. Родак із Новых Замків діє в Чехії. Там закінчів і режію і драматурґію на Катедрі алтернатівного і лялькового театру Театралной факулты Академії музичных умень в Празі. Мазух співпрацує з чеськыма і польскыма театрами.

„Демоны вышли з чоловіка і вошли до свинь. Ціле стадо ся верьгло з берега до озера і затопило ся… А народ ішов посмотрити, што ся стало. Пришли к Ісусови і нашли чоловіка, з котрого вышли демоны.  Він сидів коло Ісусовых ніг облеченый і здравого розуму. І острашыли ся,“ цітують творцьове пєсы Євангеліє од святого Лукы.

Бісы суть припадовов штудійов бунту молодых – тайного общества анархістів, котры в малім провінчнім царьскім містечку выкличуть при пробі о сполоченьскый переворот кырвавы непокої. „Позерателі стануть свідками оповіданя того общества і сторгуючой сценічной аналізы доднесь жывых механізмів насилного боя о зміну режіму, котрый родить ся із фрустрації цілой ґенерації,“ пише ся ку приготовльованій пєсі.

„Словакія, як і ціла Европа, в сучасности находить ся в складній сітуації. Різны крізы, потілічна нестабілность, соціална нерівность, неістота – безрадность і страх напомагають тым, котры просаджують просты, но часто дештруктівны рішіня.

Достоєвскый в романі Бісы, із котрого выходить драматізація, візіонарьскы пророковав ужасы російскых револуцій і епохы сталінізма. Маєме надію, же його візії ся нас і нашой епохы вже не дотуляють, і же не пророкують і нашу властну близку будучность,“ оголошають творьцове новой інсценації.

Премєра буде, як сьме уж спомянули, 16-го децембра о 19.00 год. на Великій сцені Театру Александра Духновіча в Пряшові. День перед тым, 15-го децембра, буде мож видіти Бісы в предпремєрі.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА