Черговы церковны стародрукы піддано консервациі

Єпархіяльний Осередок Православной Культуры «Елпіс» в Ґорлицях скінчыл реалізуваний в 2016 р. проєкт, якій продолжал роботы при консервациі старых церковных друків з XVII і XVIII ст., будучых частю колекциі Осередка. Консервациі піддано 4 книгы, якы походили з лемківскых сел: Білянкы, Ріпок і Бортного. Были то: Тріод Пістна з 1688 р., Святочна Минея з 1694 р., друга з 1757 р. і Требник з 1739 р.

Книгы друкуваны были в товдышніх примонастырскых друкарнях во Львові, Почайові і Уньові. Вшыткы мают одручны ноты на марґінесах. Окрем консервациі, друкы были тіж здіґіталізуваны. Проєкт был реалізуваний завдякы підпорі Міністра Культуры і Народового Дідицтва, Малопольского Воєвідства і Воєвідского Уряду Забытків в Кракові.

Того рока «Елпіс» обнял діґіталізацийом і спадковину по усопшым архієпископі Адамі – православным владыці перемышльско-новосандецкой єпархіі, якій вмер в липци т.р. Серед документів владыкы находил ся м.ін. машынопис реферату о. Йоана Поляньского, канцлеря Апостольской Адміністрациі Лемкоивины, пн. Етнічне походжыня Лемків і борба о історичну правду.

Головном цілю церковного братства «Елпіс» в Ґорлицях єст документуваня духовой і материяльной культуры Лемків. Єдном з задач єст інвентаризация лемківскых цмонтерів в ґорлицкым повіті, чого ефектом было печатаня 3 томів, в котрых описано цмонтері парунадцетьох лемківскых сел з ґмін Санкова і Устя Ґорлицкє. В реченых томах найти мож топоґрафію цмонтерів, знимкы поєдных памятників, іх опис, рисунок і выміры. Осередок владіє богатом колекцийом церковных стародруків. За пару послідніх років поєдны примірникы піддаваны сут специялистичній консервациі. Ексопонуваны сут пак в Єпархіяльным Музею, діючым попри «Елпісі». Перед 6 роками «Елпіс» печатал каталоґ, приближаючий церковны стародрукы з XVII i XVIII ст. Описано в ним вшыткого 47 друків, а як дополніня поміщено фотоґрафіі декотрых сторін. Стародрукы, котры уж здіґіталізувано, мож обзерати на сайті okp-elpis.pl. Oкрем самых стародруків, найти мож гын і сканы інчых публицкаций з колекциі братства, як напр. лемківскы передвоєнны выдавництва печатаны в ЗША.

В найблизшым часі осередок «Елпіс» орґанізує конференцию пн. Біблия а сучасніст – теолоґічний, канонічний, социяльний і соспільний переказ Біблиі для сучасных, яка проходила буде 22. листопада/новембра т.р. в Конференцийно-Выставенничым Осередку «Каштель» в Шымбарку.

Фот. за офіцийным фб-профільом Осередка.