Іван Кушнір: Найліпшы рокы минули в «Лемковині»… – проґрам «70 процент» – субота 20.00 год.

На знимці з 1981 рока видиме епізод з істориі хору «Лемковина» (Рудно, Львів). До хористів пришол гіст ― знаний совітскій писменник родом з Вільхівців (повіт Санок) Дмитро Бедзик (1898-1982). Його трилоґія «Украдені гори» ― то певно перший в Совітскій Украіні твір про Лемків. З паном Дмитром радо бесідуют староста хору Павел Юрковскій (по правій стороні) і дириґент Іван Кушнір (од лівой).

Якы то ріжны гості нераз приходили до «Лемковины»! І писменникы, і композиторы, і навет діяче з «Лемкосоюза». Но і сама «Лемковина» ходила в гості всядиль… Выступувала такой по цілій Украіні і не лем… А раз «Лемковина» з Рудна пришла в гости до «Лемковины» з Білянкы. І, розуміє ся, запросила єй до себе… о тым, і не лем о тым, бесідуєме зас ― уж другій раз ― з долголітнім кєрівником і дириґентом хору, Іваном Кушніром.