Сезон забав перед Филипівком

Для єдных і другых – значыт православных і грекокатоликів – помаленькы ближыт ся час Филипового посту, котрий має за задачу прирыхтувати вірных обох конфесий до привитаня праздника Рождества Ісуса Христа. Но, Русины цілой Карпатской Руси вєдно зо своіма Церквами, до котрых приналежат, о інчых двох датах приступлят до Филипівкы. Тото тіж перекладат ся на орґанізуваны ріжныма орґанізациями, ачий приватныма ініциятивами – даты забав, котры помаленькы чысленно буду проходити в цілым карпатскым реґіоні, ай чужыні.

Перша за шором забава перед Филиповым постом пройде 5. листопада/новембра т.р. в Шпротаві (або як повідали Лемкы – Шпортаві) на чужыні, о чым інформували сме в окремій статі. Дальшы три одбудут ся в будучий тыжден, так на Лемковині, чужыні та Словациі.

Зачынаючы од полудньового боку Карпат, в віторок 8. листопада/новембра т.р. пройде добрі знана з назвы Руснаковиця, котру орґанізуют Молоды.Русины. Забава радше в клюбовых просторах, а самособом при клюбовій діско русиньскій музыці, зачне ся о 21.15 в кошыцкым V-клюбі.

В пятницю, 11. листопада/новембра т.р. в лемківскым Ґладышові одбуде ся циклична уж забава ЛемПарти3, котра пройде в сельскій пожарничій ремізі. Першы дві едициі той радше молодіжной забавы одбыли ся влони. Товды до Ґладышова пришли бавити ся не лем рідны жытелі Лемковины, але і західнякы. Тепер хотіло бы ся, жебы завитала і русиньска челадь з другого боку Карпат. Граничний перехід Конечна-Бехерів, котрого преця уж неє (!), лем о пару кільометрів од ґладышівской ремізы.

О ден (12.11) бавила буде ся чужына, з причыны орґанізуваной Кружком Стоваришыня Лемків в Пшемкові пущаньовой забавы. Пройде она традицийно в пшемківскым домі культуры, де то танця од 20.00 год. буде грала ґрупа Водограй.