Лемкы в воєводы

26. жолтня/октобра 2016 р. в Малопольскым Воєвідскым Уряді в Кракові одбыла ся стріча передставників заряду Стоваришыня Руска Бурса в Ґорлицях з Малопольскым Віцевоєводом Петром Цьвіком. Лемківскє стоваришыня репрезентували предсідатель заряду Павло Малецкій і скарбник Богдан Ґамбаль.

Воєводу інтересували істория і сучасны активности Руской Бурсы, з притиском на выдавничу діяльніст і творіня русиньскых медий в рамках медияльной ґрупы Лем.фм. Вчас дискусиі презентуваны были потребы лемківской меншыны, особливо процедуры і недостаточне фінансуваня задач, особливо коли возме ся до увагы міру і ефекты діянь Руской Бурсы. Зо зрозумліньом воєводы был принятий постулят про системове забезпечыня вшелеякых культурных і освітовых діянь на хосен Лемків, котры мали бы реалізувати записаны в законі принципы охороны і розвитку лемківской етнічной достоменности.

Воєвода согласил з представленом концепцийом хоснуваня в лемківскых медиях літературного русиньского языка, як основного для сохраніня материньского языка ґрупы. Єдночасно заповіл, што проблемы лемківской етнічной меншыны і зголошены йому діячами Руской Бурсы припадкы дискримінацийных діянь взглядом Лемків, в тым зо стороны декотрых украіньскых середовиск і орґанізаций, будут моніторуваны і дискутуваны на наступных того рода консультациях.