Ожывать Фіґлярьска нота

Єдным із успішных і міджі людми вобзлюбленых проєктів, котрый в минулости шторік приготовльовала Русиньска оброда на Словеньску, быв фестівал гумору і сатіры На фіґлярьску ноту. В рамках нього дакілько років презентовав ся русиньскый гумор – фіґлі, народне росповіданя. Фестівал быв знамый і тым, же співаци, припадно ансамблі, котры выступали на Фіґлярьскій ноті, приготовили собі шпеціално на тоту нагоду гуморны тексты на співанкы у своїм репертоарі.

Фестівал гумору ся в остатніх роках перестав робити. Завдякы членам Містной орґанізації Русиньской оброды на Словеньску в Пряшові – Теодозії і Іґора Латтовых, того року На фіґлярьску ноту знова ожыє.

Уж тоту суботу 22-го октобра 2016-го року можете іти до Дому културы в селі Пчолине, в окресі Снина, де о 16.00 год. будете по довгых роках знова годны видіти тото найліпше з русиньского гумору. В рамках фестівалу На фіґлярьску ноту будуть выступати Іґор Латта, довгорічный член драматічного колектіву Театру Александра Духновіча в Пряшові, як модератор, Фолклорна ґрупа Габурчанка, Роланд Ґуба, Фолклорна ґрупа Пчолинчанка, і многым добрі знамы, все гуморны „кумове“, котрых так само было мож довгы рукы слухати в рамках русиньского высыланя Словеньского розгласу.

Фестівал На фіґлярьску ноту 2016 є реалізованый завдякы фіначной дотації із Уряду влады Словацькой републікы – проґрам Култура народностных меншын 2016 і вдяка фіначной помочі од Сельского уряду в Пчолинім.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА