Лем.фм по анґлицкы

Click here to enter English version of lem.fm website

З приємністю презентуєме Вам анґлицку версию порталю ЛЕМ.фм. В днешнім світі часто сходят ся дві протиставны силы: асиміляция і ґлобалізация. З асиміляцийом Русинів фурт ся бореме – не єст то справедлива борба, бо є нас барз мало, а тых, што знают свою рідну бесіду – іщы меньше. Ґлобалізация – з другой стороны – помагат ся нам приближыти в тым великым світі. Анґлицкій язык є днес ґлобальний – бесідує ним цілий світ – бесідуєме і мы. Най анґлицкы версиі дописів ідут за велику млаку. Най знают вшыткы в світі, же іщы сме і фурт будеме.

А діло тото можливе стало ся завдякы вельох осіб. То предовшыткым фундаторы той ідеі – Фундация Йоана і Олены Тімо (John and Helen Timo Foundation). Але тіж активны і заанґажуваны молоды Русины, котры тото вшытко роблят, познайте іх:

Мария Сільвестрі, окрем того же занимат ся коректом анґлицкой версиі, барз помогла довести тот проєкт до того етапу.

Наталия Горбаль то робітна і здібна професийна анґлистка, котра навет тото речыня Вам переведе. 🙂

Серверами, php, mySQL, postgres і інчыма цифровыма чортами рядит Ксандер Клинковскій.

Вшыткым Вам – іменом Стоваришыня Руска Бурса в Ґорлицях – дякуєме!