В Сукові на цінтері прибудуть мена похороненых вояків

На цінтері із І. світовой войны, котрый ся находить в русиньскім селі Суків в окресі Мідіжлабірці, прибудуть таблічкы з менами павшых вояків, котры там суть похоронены. Інформує о тім денник Korzár.

Мена вояків подарило ся здобыти в співпраці із добровольниками з Чеськой републікы, одкыль походило много там похороненых вояків.

Як повів про денник Мартін Дробняк із Клубу воєньской історії Бескиды (Klub vojenskej histórie Beskydy), іншталованы будуть і таблічкы з менани вояків, о котрых ся не знать, де точно суть їх тілесны остаткы уложены, но знать ся, же вмерли в околіці Сукова. На цінтері вже добровольници з Мадярьска і Словакії збудовали централный пішник, так само были забетонованы спідні желізны части, на котры были насаджены деревяны кресты. На цінтері находить ся і автентічный памятник з часів войны, коло котрого ся выложыла плоха природным каміньом.

На цінтері є похороненых веце як 180 жертв, іде головно о вояків австро-угорьской армады. Є ту 66 гробів, далше там суть і сполочны гробы і масовы шахты. Основне утримованя цінтеря робить містна самосправа. На обновліня цінетря фінанції дало і Міністерство обраны Чеськой репбулікы і австрійска орґанізація Чорный крест, котра присвячать ся старостливости о австро-угорьскы воєньскы цінтері по цілім світі.

Жрідло фотоґрафії: kvhbeskydy.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА