Русин фільм фест

Як сме уж інформували на нашым портали, 1. і 2. жолтня/октобра 2016 р. в сербскым місті Шыд буде проходил І Медженародовий Мультіжанровий Фестіваль Русиньского Фільму під назвом «Русин Фільм Фест». Подію спілорґанізуют реґіональлный одділ «Руской маткы» за Срим і Світовий Конґрес Русинів.

Як пише орґанізаторка фестівалю – Саня Тиркайло – понеже каждий з будучых фестівалів має быти тематичний, так і тот буде посвячений окремій тематиці. Того рока буде то: Русины в першій Світовій Войні. Окрем основной темы, першого дня, коли фестіваль буде отвераний, пройде і презентация, вчас котрой буде емітувана ретроспектива фільмів про Русинів і Карпатску Русь – буде емітуваний образ реалізуваний росийскым творцьом Алексийом Денісовом «Траґедия Галицкой Руси».

Другого дня одбуде ся «Трибуна», дискусия на згадану основну тему фестівалю при участи істориків зо Сербіі, Словациі і Польщы. А на конец буде вказаний перший русиньскій фільм з 1933 р. пн.: «Мария Невірниця» (Підкарпатска Русь).

Орґанізаторы рахуют, што на перший Русин Фільм Фест придут члены Світового Конґресу Русинів зо Словациі, Польщы, Украіны, Хорвациі і Мадяр з предсідательом Штефаном Лявинцьом, передставникы власти Республикы Сербія, автономічной Войводины, та делеґациі амбасад словацкой, білоруской і росийской в Бельграді.

Радийо Лем.фм достало позваня на Русин Фільм Фест.