Будут підзерати птахы

Маґурскій Нацийональний Парк семий раз просит на одкрыту прогульку з циклю «Гев і Тепер» – пaругодинну едукацийну природничу вандрівку з окрисленом темом, ведену специялістом і фахівцьом з МНП. Тым разом буде то орнітолоґічна прогулька, яку поведе Даміан Новак, котра одбуде ся 25. вересня/септембра.

Осінні вандрівкы птахів входят як раз в свою найбарже інтенсивну фазу – лукы, лісы, париі полны сут пасучых ся в перерві вандрівкы птахів, а на небі зас являют ся клины кричачых журавлів. Траса прогулькы буде ішла зеленым путьом через верх Высокє до дорогы Жыдівскє-Ожынна. Том дорогом прогулька верне до початкового пункту. Верх Высокє то найліпший видоковий пункт в Парку, барз добре місце до слідуваня вандрівок птахів.

Прогулька заплянувана єст на 3-4 годины. Орґанізаторы застерігают, же кєд бы ляло і была брыдь хвиля, прогулька буде переложена. Початок – о 8.00 год.