Актывна діяльніст Бібліотекы Руской Бурсы

Якісий час тому інформували сме вас о візиті делеґациі з Норевеґіі в Рускій Бурсі (до почытаня за тым мотузком), повязаній з проєктом Бібліотека Місцьом Стріч Вельох Культур, якой участником є тіж Стоваришыня Руска Бурса зо свойом бібліотеком.

Цілу осін працували сме, як бібліотека Руской Бурсы, до спілкы з Містeцком Публичном Бібліотеком ім. Станіслава Ґабриєля в Ґорлицях, як лідером ґорлицкого партнерства, завязаного в рамках проєкту, над опрацуваньом в бібліотечным системі СОВА2 каталоґу он-ляйн выдавництв оферуваных в бурсяній бібліотеці.

Сукцесом єст не лем тото, же повело ся ввести уж більшіст книжок, якы видочны сут уж в каталоґу он-ляйн на сайті Містецкой Бібліотекы, але факт, же можеме похвалити ся тым, же перше выпожычыня в проєкті Реґіоналиі, якє мало місце пару дни тому, то книжкы з оферты Бібліотекы Руской Бурсы!

Тішыме ся з того і думаме, же то лем початок більшого заінтересуваня цікавом і вынятковом офертом книжок доступных в бурсяній біліотеці. Вшыткых заінтересуваных заохочаме до особистого одвиджаня бібліотекы в каждий понедільок в год. 14-18 або в індивідуальні домовленым терміні (пиште на адрес natalia@lem.fm)

Пониже презентуєме інформацийну нотку лідера проєкту – Містeцкой Публичной Бібліотекы в Ґорлицях, яку найти можете тіж на сайті бібліотекы в закладці Aktualności -> Projekty, а неодолга тота віст найде ся тіж на загальнопольскым бібліотекарскым сайті www.biblioteki.org