Загальне Зобраня в Рускій Бурсі!

В суботу, 15. марця того рока, проходило Загальне Зобраня членів Стоваришыня Руска Бурса в Ґорлицях, котре мало підсумувати діяльніст заряду Руской Бурсы в 2013 р., выбрати новий заряд і накрислити плян діяльности до наступного засіданя.

На зобраню, окрем тем, якы тыкают внутрішніх діянь Бурсы, вела ся бесіда о актуальных проблемах: одкликаню проф. О. Дуць-Файфер зо Спільной Комісиі Уряду та Нацийональных і Етнічных Меншын, пробах знищыня великого і нобілітуючого для лемківского языка діла – лемківской філолоґіі на Педаґоґічным Універистеті, ци неприднагідных атаках завязаной недавно таємной коаліциі священників, передставників антилемківской достоменности і другых (більше в архівальных статях порталю lem.fm).

Загальне Зобраня выбрало Ревізийну Комісию (Йоан Ковальчык, Миколай Падухович, Мирослав Пелехач) і новий Головний Заряд, якого шефом остал дотеперішній ведучий – Богдан Ґамбаль, даючы му довіря на ведіня Руской Бурсы наступний рік. До заряду вошли іщы: проф. Олена Дуць-Файфер (як заступник ведучого), Наталия Малецка (секретар), Даміан Трохановскій (скарбник), Василь Адамяк і Павел Малецкій.

Нововыбраний заряд одраз взял ся за роботу і на першым своім засіданю розділил функциі, та, як першу свою постанову, затвердил плян акций в Рускій Бурсі, якій – разом з минулыма тогорічныма подіями – передставляме пониже:

– Перегляд колядничых ґруп / 26. січен
– Концерт промуючий платню „Пісні і сьпіванкы Петра Мурянкы – част 2” / 15. лютий
– Варштаты батканя писанок + прелекция о іконах / 13. квітен
– Выстава посвячена творцям: Несторови Жыличовы і Яковови Дудрі / 18. май
-Закінчыня шкільного рока / конец червця
– Варштаты весільного обряду / липец
– Театральны і плястычны варштаты для діти / липец
– Лемківска едукацийна загорода / серпен
– Початок шкільного рока / вересен
– Выізд до Талергофу (разом зо Стоваришыньом Лемків) / вересен
– Прелекциі посвячены памяти о Талергофі / жолтен
– Выстава вышываня / листопад
– Передвелийна стріча / 27. груден

Были і неприємны моменты, бо ок. 10.30 год., до будинку Руской Бурсы в Ґорлицях мусіла приіхати поліция, яка остала закликана на просьбу заряджаючого будинком бурсы. Вшытко з причыны двох осіб (Анна К. і Лідия К.), якы – непрошены (є то внутрішнє засіданя РБ) – вошли до будинку і не хотіли выйти, бльокуючы шторічне Загальне Зобраня членів Стоваришыня Руска Бурса. По острій дискусиі, вылеґітимиваны поліциянтами, обі пані вышли з будинку Руской Бурсы.

То уж другій раз (по подіях з влонишнього зобраня), коли дві тоты самы особы не позволили зарядови і членам РБ зачати засіданя, неправдиво бесідуючы поліциянтам, же мали бы быти членами РБ і мати право участвувати в зобраню.

О дальшых подіях будеме інформувати на портали радия лем.фм, бо, як сме ся неофіцияльні дознали, справа може ся скінчыти в суді.

Желаючы зарядови (певно і собі, бо-м до заряду вошол) цілий рік робити без потребы звертаня ся о поміч до шандарів, кінчу дополнену о мериторычний зміст статю.