5 років лем.фм, 25 років реактивациі Руской Бурсы

Днес маме великій праздник. Такой аж трійний! Перший то Медженародний Ден Дітины і хоц то найменьше важна подія, то лучыт ся она з ювілейом 5-літя основаня лем.фм. Бо можна гев повісти, же є то наша дітина. Наша, то значыт люди, якы громадят ся наоколо Руской Бурсы – орґанізациі, хыжы, символю.

Руска Бурса была основана в 1908 році, але по выкликаній історийом долгій перерві в істнуваню, єй діяльніст была взновлена 1. червця/юнія 1991 рока – рівно 25 років назад.

В звязку з тым, святкуєме днес аж два ювілеі! На жаль, окремо, але за то по цілым світі – в Ґорлицях, в Пряшові, в Кракові, в Варшаві, в Ліґници, во Вроцлаві і на всякій інчій чужыні, де нас розшмарило.

Такы шумны ювілеі потрібуют єднак стрічы і ритуального одпразднуваня. Зато запрашаме 18. червця/юнія до Руской Бурсы, де зрыхтуєме дашто для тіла і для духа. Надієме ся на родинну і приятельску атмосферу, в котрій з сатисфакцийом підсумуєме минуле.

Руску Бурсу 25 років тому покликали:

• Анна Ґамбаль,
• Анна Перегрим,
• Антоніна Коцур,
• Боґдан Ґамбаль,
• Ігор Горощак,
• Ірена Квока,
• Мариюш Габура,
• Мелянія Клинковска,
• Миколай Падухович,
• Михал Коцур,
• Мирослава Хомяк,
• Ольга Каня,
• Олена Дуць-Файфер,
• Павел Стафиняк,
• Юлия Прокопчак,
• Йоан Квока.

Першом ведучом были пані Ольга Каня. Веце з істориі Бурсы можна прочытати в Річниках РБ і за мотузком. Там тіж написане про просторы нашой діяльности і активности. Але тото, што робиме, видно не лем наштоден, але пару раз на ден – і тото рахую за бодай найбільший хосен.

Ґрупа лем.фм то не лем радийо, выдумане і основане Богданом Ґамбальом, якій был тіж долголітнім ведучым РБ. Лем.фм то днес єден з каменів, на якых побудувана лемківска достоменніст і культура.

Дякую вшыткым, якы трудят ся про лемківскій нарід – а особливо Бурсакам. Дякую нам прихильным і тым, якы спомагают нашу присутніст. Вірю, же 18. червця/юнія буде час пізрити щестливим оком на тото, што уж зроблене, а і на тото, што іщы ніт.

Желам нашым днешнім Ювіларям Многых і Благых Літ!