«Лемкы сут найліпшыма священниками»

В понедільок і віторок, то є 4. і 5. липця/юлия т.р., в штырьох церквах на Лемковині – Высові, Білянці, Креници і Ґорлицях, проходили концерты церковной музыкы в рамках шторічной подіі пн. Церковна музыка в Низкым Бескіді, орґанізуваной Православном Парохійом в Ґорлицях та Повітовым Староством в Ґорлицях во спілпрацы з Містом Ґорлиці.

Того рока на выступы запрошыня принял Православний Хор Зеленогірского і Любіньского Деканатів під ведіньом Даниіла Ґалчыка. Хор запрезентувал літургічны і паралітургічны творы, вказуючы богатство і зріжницюваня церковного співу. Были творы співаны в церковнославяньскым, ґрузиньскым ци сербскым языках, в галицкым та інчых напівах. Хористы то головні священникы, котры служат на лемківскых парохіях на чужыні. Вшыткы сут Лемками, родженыма, окрем дириґента, уж як потомкы выселенців на західніх землях Польщы.

Другій з запрезентуваных хорів то місцевий, тіж мужскій, Камеральний Хор Осередка Православной Культуры «Ельпіс» в Ґорлицях – «Клірос». Подібні як в гостюючым хорі з заходу Польщы, і його членами сут выключні Лемкы. Част то священникы, якы служат в околичных лемківскых парохіях. На ґорлицкым выступі, запераючым тот цикль концертів, присутний был передставник Рады Повіту Роман Дзюбина та православний владыка Паісий, єпископ ґорлицкій.

Владыка як раз о пару днів буде празднувал округлий ювілей дня свого народжыня, зато при нагоді вчерашньой стрічы парох ґорлицкой церкви о. прот. Роман Дубец зложыл владыці желаня. Значучы были кінцьови слова владыкы, якій повіл, же желат каждому єпископови такых священників, якых він мат під собом – значыт Лемків. Повіл, же Лемкы сут найліпшыма духовныма, одданыма і заанґажуваныма. Подібні повіл і о лемківскых вірных, підркисляючы іх вынятковіст. Пару слів на конец додал іщы представник локальной влады, Роман Дзюбина, якій звернул увагу, же завдякы находячым ся в Ґорлицях мощам св. мученика Максима, ціле місто досвідчат божой благодати. Додал, же причынят ся тіж тому присутніст владыкы в місті, што барз радо дополнил сам архієрей, додаючы, же в звязку з тым званя Ґорлиц то: преподобне владычне місто Ґорлиці…

фот. Александер Ґуцва, sekowa.info