“Руска Матка” по выборах

Выборчий конґрес найважнійшой соспільной організациі Руснаків в Сербіі одбыл ся 22 лютого 2014 рока.  

За предсідателя Руской Маткы (РМ) наново был выбраний Дюра Папуґа з Руского Керестура, котрий є тіж предсідательом Світовой Рады Русинів/Руснаків/Лемків.Заступцьом ведучого был выбраний Мільомир Шайтош з Нового Саду.

В суботу, 22. лютого в Рускым Керестурі зобрало ся праві 30 делеґатів, членів Руской Маткы з єй льокальных кружків з Керестура, Коцура, Вербаса, Кули і з Нового Саду. Заступці ведучого Руской Маткы будут заєдно предсідателями фаховых комісий – Владимир Дудаш з Керестура буде займувал ся выдавничом дiяльністю і медиями, Міломир Шайтош буде одоповідал за культуру, Владимир Бучко з Кули за економічны проблемы і Ксения Мученска з Коцура буде займувала ся шкільництвом.

Попри спомянутых, до заряду (Управного Одбору) Руской Маткы вошли членове льокальных орґанізаций – Моніка Гарді з Коцура, Деян Загорянскій з Вербасу і Владислава Гарді з Нового Саду, Зас з Руского Керестура в заряді  нашол ся Владимир Джуджар, шефом Форум Молодых Руской Маткы – Давор Сабо, за секретаря выбрана остала Марія Дорошкі з Руского Керестура.

Портпарольом (пресовым говорцьом) Руской Маткы скупштіна выбрала проф. др Михайла Фейсу з Коцура.

Вшыткым нововыбраным ґратулюєме, і желаме дуже успіхів в іх праци для розвитку руснацкой культуры і достоменносты.

(джерело – рутенпресс)