Новий сезон Стоваришыня Маґурич (ВСТУПНИЙ ПЛЯН)

Стоваришыня Маґурич то орґанізация нон-профіт, яка од понад 25 років ремонтує і сохранят перед знищыньом цмонтері, придорожны кресты, каплиці, дзвінниці ци інчы елементы сакрального мистецтва – ратує місця, де уж не жыют люде, котры могли бы ся заопікувати спадщыном своіх предків або місця, в котрых нихто з жыючых ся до того не почуват. В тот спосіб ратуваны сут шліды м.ін. по Лемках в селах, в котрых іх самых уж неє. В тот спосіб ратувана і передолжана є істория в селах, в котрых Лемкы мешкают, але… ся ім не хце о тото задбати? Не знают як тото зробити?

Стоваришыня Маґурич выремонтувало білше як 1000 помників на веце як 100 цмонтерях.

На Лемковині было м.ін. в Команьчы, Віслоку, Липовци, Бальници, Черемсі, Воли Нижній і Воли Выжній, Дарові, Чыстогорбі, Мощанци, Шклярах, Мшані, Полянах Суровичных, Котани, Крампни, Ожынні, Полянах, Грабі, Жыдівскым, Радоцині, Вышоватці, Тыхани, Долгым, Волівци, Бортным, Смереківци ци в Новици.

Каждохо рока орґанізуваных є пару ремонтовых обозів в ріжных частях, головні полудневой, Польщы, часом на Украіні і в інчых державах. Участ в обозі може взяти каждий. Выстарчыт кус охоты і силы.

Тогорічний ремонотвий сезон розпочынат ся ремонтом на лемківскым цмонтери в Реґєтові Нижнім і Выжнім в днях од 26 IV до 4 V 2014 рока.

А потім в пляні сут іщы обозы:
29 VI – 13 VII – Вєжбіца, ґм. Лубыча Крулевска, ремонт помників на сельскым цмонтери;

20 VII – 3 VIII – Маластівкса Маґура, ґм. Устя Ґорлицкє, реконструкция піраміды на цмонтери з І Світовой Войны;
VIII – Суровичны Поляны, ґм. Команча, континуация ремонту муруваной з каменя прицерковной дзвінниці.
Додатково медже V а кінцьом X 2014 рока будут проваджены менчы акциі на обшырі Низкого Бескиду (село Долге) і Бєщадів (Буковец н. Саном, Яворец) і інчы, о котрых будеме інформувати.

Охочы можут ся зголашати на адрес: stowarzyszenie@magurycz.org

Стоваришыня найдете на сторонах:

www.magurycz.org i www.facebook.com/StowarzyszenieMagurycz