Стріча в Антоничівці

Обьєднаня Лемків запрашат на стрічу про Петра Пыртея і книжку Лемківски говірки. Фонетика і морфологія, ред. В. Гойсак, Ґорлиці 2013.

Стріча обнимат презентацию жытя і наукового доробку Петра Пыртея, показ архівальных знимок і выбраных выдавництв посвяченых лемківскій бесіді.
Орґанізаторы – Обьєднаня Лемків, якє не узнає кодифікациі лемківского языка і разом з 8 лемківскыма орґанізациями протестує противко дотациі на лемківску філолоґію, яка ведена є на Педаґоґічным Унівеситеті – хотят побесідувати о сучасным стані лемківского языка.

Гостьом стрічы буде Лілія Тхір, дівка Петра Пыртея.
Стріча одбуде ся 23 лютого 2014 р., о 16 годині в Центрі Культуры ім. Б. І. Антонича в Ґорлицях.

Петро Пыртей (1919-1999) – вродил ся в Смереківци на Лемковині, де тіж скінчыл основну школу. Ґімназию закінчыл в Ґорлицях (мешкал в Рускій Бурсі). Пак вчыл ся в Коросні і учытельскій семінариі в Креници. В роках 1941-45 учытелювал в лемківскых селах – во Фльоринці і Перунці.
В 1945 был выселений на Украіну, де по скінчыню студий працувал як учытель. 

Петро Пыртей є автором книжкы Короткій словник лемківских говірок выданой в 2004 році в Івано-Франківску Нацийональном Академійом Наук Украіны.