Гуменьскый вікенд з Добряньскым і фолклором

Вігорлатьскый музей в Гуменнім на найблизшый вікенд 17-го і 18-го септембра 2016-го року приготовлює такой дві інтересны події.

В суботу 17-го септембра одбуде ся подія під назвов Заповідь Адолфа Івановіча Добряньского про сучасность. Співорґанізаторами події, на котрій одзвучіть пять тематічных лекцій, суть Русиньске здружіня інтересів і Матиця словацька.  Подія зачінать о 13.00 год. в просторах засідалні Містьского уряду в Гуменнім і лекції будуть передавати доц. Ян Шафін – декан Православной богословской факулты Пряшівской універзіты в Пряшові, Мґр. Мілан Ясик – член Общества св. Йоана Крестителя і ґрекокатолицькый парох в Ольці, ЮДр. Маріян Ґешпер – підпредседа Матиці словацькой, доц. ПгДр. Андрій Антоняк, к. н. і Мґр. Александер Онуфрак, ПгД. із Катедры політолоґії Філозофічной факулты Універзіты Павла Йозефа Шафарика в Кошыцях.

На неділю 18-го септембра є приготовленый вже Х. річник Фестівалу народностной взаємности. Співорґанізаторами події суть Пряшівскый самосправный край і місто Гуменне. Фестівал буде мати дві части. Перша зачінать ся о 13.00 год. в сканзені Вігорлатьского музею, де буде проходити Фолклорне пополідне – реґіоналный конкурз музичного фолклору дорослых.

О 17.00 год. буде проґрам продовжовати на намістю перед Містьскым културно-освітнім центром. Тота часть проґраму має назву Заповідь предків. В рамках ньой участны будуть годны выслухати концерт многых запрошеных фолклорных колектівів і вєдно з тым буде повязане і крещіня нового авдіодіску з дітячіма співанками під назвов Рутеніка ІІ. Детайлный проґрам подій найдете долов на плаґатах.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА