Фестівальовий вікенд серед Русинів на Словациі – аж 4 імпрезы о єдным часі!

Хоц вакацийний період та і час жнив помалы приближают ся ґу кінцьови, то істинний вроджай на фольклорны фестівалі тырват по другій страні хырбета Карпат. Каленадр подій на передостатній вікенд серпня/авґуста є выполнений по берегы. Хто не здолял через ціле літо взяти участ в дотеперішніх імпрезах, може тото надробити, выбераючы спосеред штырьох подій, з деякыма русиньскыма акцентами, якы орґанізуваны сут в Словациі:

• 20.08.2016 р. (субота) буде проходил 19. Річник Радваньскых Славности, на котрым, окрем фольклорных ансамблів, як напр. Железяр з Кошыц, Русиньскы голосы з Гуменного, вкажут ся артисты з барже модерным ци дискотековым репертуаром: Дрішляк, Пальо Драпак, Ролянд Ґуба і братя Зяткові та інчы;

• 20.08.2016 р. (субота) на ХХІ. Фестівали Фольклору Русинів в селі Баєрівці пн. «Кед я стадыль піду», запрезентуют ся ансамблі Баєрівчан, Кечера, Русиньскы голосы, Барвінок і інчы. Про тот фестіваль писали сме окремо на портали – чытайте гев;

• 21.08.2016 р. (неділя) буде проходил 5. Річник Фестівалю в Капішовій пн. Жебы в Долині смерти было весело. Выступлят фольклорны ансамблі Маковичка, Маковиця, Раславичан, Железяр ци Земплин, а модератором фестівалю буде Ондрей Кандрач – музык з Кандрачовців.

• 21.08.2016 р. (неділя) – Кальна Розтока в Скансені в Гуменным, по службі божій выступлят м.ін. ґрупа Бескід, солисткы: Тамара Волохова, Ванда Марінчакова, Мирослава Хомова і інчы.