Вірны попращали владыку Адама (фото: Н. Малецка-Новак)

Вчера, 27. липця/юлия, вірны Польской Автокефальной Православной Церкви попращали владыку Адама – архієпископа перемышльского і новосандецкого. Похоронным богослужыням проводил митрополита варшавскій і цілой Польщы Сава при участи архієпископa Авеля, архієпископa Яковa, єпископa Григория, єпископa Паісия та чысленных священників і вірных з Польщы, Украіны, Словациі і Румуніі.

Владыка Адам зо Саноком звязаний был через піл столітя, найперше як парох і декан, пак од 1983 р., по хіротонізациі на єпископа як предстоятель єпархіі, в 1996 р. піднесений до ранґы архієпископа. В саноцкій церкви проходили похоронны богослужыня. Кондоленцийний лист переслал м.ін. президент Польщы Анджей Дуда.

Владыка Адам вродил ся во Фльоринці. Пережыл войну, выселіня в рамках Акциі Вісла, а на Лемковину вернул уж як священник. В пращальных словах участників похорону припоминаны были заслугы архієрея, м.ін. побудуваня новых церкви (Зындранова, Крениця, Ґорлиці, Команча, Реґєтів, Білянка, Ряшів), плебаній, покликаня Мужского Монастыря Покровы Пресвятой Богородиці в Высові ци Осередка Милосердя «Елеос» в Ґладышові, доведіня до канонізациі о. Максима Сандовича та вельох інчых. Владыку Адама попращал митрополита варшавскій і цілой Польщы Сава.

По похоронных богослужынях в Саноку, тіло покійного владыкы было перевезене до Крениці і при присутности єпископа ґорлицкого Паісия (рішыньом собору єпископів завідуючого перемышльско-новосандецкой єпархіі через 40 наступных днів – до выбраня нового предстоятеля єпархіі) та парунадцетьох священників зложене в гробници в церкви св. Владиміра Великого. В пращальных словах владыка Паісій підкрислил привязаня владыкы до рідной лемківской землі і свого народу.

Так в Саноку, як і в Креници, пращали лемківского єпископа чысленны вірны. Владыка Адам был найстаршым православным єпископом в Польщы. 14. серпня/авґуста скінчыл бы 90 років.