«Слово» – неділя, 9.00 год.

Пята неділя по Сошестві Святого Духа – О выздравліню овладнутых демонами в Ґадаріньскім краю.

Ісус Хрістос кажде слово ці діло говорив і робив на хосен чоловіка про наше спасіня. Так і в днешнім Євангелію. Ісус приходить до пустого краю, до краю поганів. Як вышов із кораблика, ідуть ку ньому двоми бісноваты, были так розъїджены, же нихто ся не осмілив іти тов дорогов. Но тоты, котры каждому наганяли страх, теперь самы ся трясуть і кричать: Што тобі до нас, Ісусе, Сыну жывого Бога. Ты пришов ту передчасно нас мучіти? Кідь спостерігаме, так не тоты люди кричали, але бісы в них познавають Хріста. І про них є великов муков творити і против волі Божой. Ісус їм приказує зохабити тых людей, а они го просять, абы їм доволив войти до стада свинь. Ісус їм доволює не зато, жебы зробити злому духу по волі, але на наше поучіня, абы указати, як велике множество злых перебывало в тых людях, а што бы ся стало, як бы Бог не утримовав і не забранив, жебы їх знищіли. Злый дух хоче лем загубу чоловіка на тілі, але головно хоче загубити його душу в аді. По одході злых духів тоты люде сидять коло ніг Ісуса. Тым Євангеліом нам указує Хрістос, што значіть быти в притомности Бога, повнити його волю, а што значіть дати ся до рабства Злого. Но народ того краю не прияв Ісуса. Просять го, жебы одышов з їх краю. Ісус є тихо, одходить од них. Решпектує їх вольбу. Не будьме їм подобны, выберайме Хріста, як нас учіть св. Василій, а не Божого противника, котрый про нас нич доброго не зробив і мы через неслухняность його заповідям, через привязаность ку земному, через любов ку страстям, через одступництво од Господа, його наслідуєме. Хрістос, котрый про нас став ся чоловіком, умер за нас, даровав нам своє Царьство і самого себе, а мы на тото не думаме, радше хочеме зіставати в старім способі жывота і выганяме Хріста од себе. Най тоты слова св. Василія не платять о нас. Але майме на памяти поучіня днешнього слова, утікайме од рабста діявола а перебывайме при ногах Хріста. Слава Ісусу Хрісту!

В неділю, 24-го юла/липця 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24-го юла/липця о 12.00, 15.00, 20.00 год. і 25-го юла/липця о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Выздравліня овладнутых демонами в Ґадаріньскім краю. Жрідло: Wikipedia.