Фотореляция з Лемківской Едукацийной Загороды 2016

Просиме до обзераня фотореяциі з 3. едициі табору для діти і молодежы пн. Як жыли нашы предкы?, орґанізуваного Стоваришыньом Руска Бурса в Лемківскій Едукацийній Загороді в Ґладышові. Табір проходит од 13. до 19. липця/юлия т.р.

Участникы табору як будете видіти на знимках, занимали ся уж вельома аспектами колишнього жытя на селі. Докладні познали, вынюхали та навчыли ся познавати вшелеякє зіля і зерно, якє росне на Лемковині. Дознали ся, як вырабляти полотно – од засіяня лену, через цілу обробку, включаючы тканя і пряджыня, аж по омовліня цілого лемківского облечыня.

За тоты першы дни провірили тіж, як давно жыло ся на ґаздівці – было вчыня косити косом, вязаня снопків, молочыня зерна ціпами, чыщыня зерна на решеті, молочыня кєратом, млинцьом. А то іщы не конец занять. Тогорічна ґрупа діти складат ся з участників з західніх земель та місцевых з Лемковины. Інструкторами сут Ваньо і Данута Дзюбины, а занятя з языка і культуры веде учытелька лемківского языка – Варвара Дуць.