На бывшім боїску в Гостовицях є нова дзвоніця

„Унікатный проєкт дзовніці на боїску І. світовой войны ся ближыть до фінале,“ інформує на своїм фейсбуковім фанпейджі Клуб воєньской історії Бескиды (Klub vojenskej histórie Beskydy), котрый інціовав роботы в русиньскім селі Гостовиці, на теріторії історічных боїв Карпатьской фронты в роках 1914/1915.

Почас І. світовой войны коло села Гостовиці проходили тяжкы бої. Головно в апрілю 1915-го року почас Великодньой битвы в Карпатах на берегах над селом проходили бої, котры собі выжадали тісячі мертвых і далшы тісячі раненых людей. Проти собі в тім просторі войовали австро-угорьска і російска армады. В австро-угорьскій армаді были тых боїх участны і реґіменты, котры реґрутовали вояків із теріторії днешньой Словакії. Бої над Гостовицями собі так выжадали і жывоты нашых предків, інформовує далше Клуб воєньской історії Бескиды.

Думка збудовати дзвоніцю выникла у 2015-ім році. Втогды клуб орґанізовав турістічный поход на місця тых боїв. Почас походу выникла думка збудовати на боїску дзвоніцю, котра буде припоминати смерть множества вояків, котры там загынули. Проєкт за інформаціями клубу міг быти зреалізованый дякуючі ентузіазму дакілько фундаторів і завдякы добровольникам, котры помагали з роботами. В суботу 9-го юла 2016-го року была дзвоніця змонтована на своїм місці. Цілый проєкт збудованя дзвоніці мав стояти коло 10 тісяч евр.

„Чекать на іщі управліня підставця і околіці. В літі 2016-го року плануєме святочне одкрытя. Ку дзвоніці поведе научна стежка, котра буде присвячена як раз темі насаджіня вояків із теріторії днешньой Словакії на Карпатьскій фронті 1914/1915,“ закінчує інформацію Клуб воєньской історії Бескиды.

Клубу ся у тім селі вже подарило обновити войновый цінтерь. Свої роботы клуб фінанцує головно з різных дарів, сістематічно жадають дотації формов ґрантів. Великов помочов про клуб суть і фінанції здобыты асіґнаціов двох процент з дани.

Добровольницькы міджінародны таборы, в рамках котрых ся зачало робити і на дзвоніці в Гостовицях, орґанізує Клуб воєньской історії Бескиды уж од 2011-го року. На них брало участь уж дакілько десяток людей із Словакії, Мадярьска, Польщі, Чеськой републікы, Румунії і Словіньска, котры одробили тісячкы годин, бо їх інтересує історія. У тім році мать клуб напланованы штири такы таборы.

„В рамках того сьме зачали і з обновляньом войнового цінтеря з І. світовой войны у Велькропі (в окресі Стропков, позн. редакції), котрый оправляме уж дакілько років. Є то тяжке, бо іде о найвекшый цінтерь із І. світовой войны на Словакії,“ увів недавно про словацьку державну пресову аґентуру TASR председа клубу Мартін Дробняк з тым, же там є поховано 8 662 вояків.

Клуб воєньской історії Бескиды ся заподівать дісліджованьом подій І. Світовой войны і ініціовав основаня вышеградьской робочой ґрупы про старостливость о войновы цінтері, котра соєдинять обчаньскы здружіня із середньой  Eвропы, котры присвячуть свій час старостливости о тоты пєтны місця.

Жрідло фотоґрафії: Klub vojenskej histórie Beskydy.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА