Выдавничы новости

В остатніх днях свою премєру мали два періодикы, тыкаючы шырокопонятой карпатской темы. Што більше, в публикациях «Альманах Мушыны» і «Плай» часто являют ся дописы про Лемків, іх історию, культуру та вшелеякы інчы особливости повязаны з цілом Лемковином.

Што рока на переломі червця/юнія і липця/юлия печатаний єст «Альманах Мушыны». Тогорічна презентация специяльного 26. тому «Альманаху» одбыла ся в неділю 3. липця/юлия в Мушыні. Зміст того специяльного выдня то бібліоґрафія 25 печатаных в роках 1991-2015 томів, опрацувана через Луцию Буковску. Однотуваных в бібліоґрафіі єст коло 1400 позиций і близко 400 авторів. Окрем того, в тым выданю нашло ся опрацуваня пн. Альманах Мушыны для Малой Вітчызны 1991-2015, якє омавлят головны ініциятивы редакциі та Стоваришыня Приятелів Мушыны. Дополніньом публикациі сут іщы дедикуваны для него тексты проф. Болеслава Фарона, Вітольда Каліньского, дра Тадеуша Лопаткєвича, проф. Тадеуша Трайдоса та Анджея Вєльохы і Збіґнєва Воляніна. Публикацию печатано в традицийній формі і на диску ЦД.

Другым періодиком, якій в остатнім часі был одданий в рукы чытачів, єст зачынаючий другу пятдесятку «Плай», номер 51. Выдавництво зачынат ся дописом польского етноґрафа Антония Крога про зорґанізувану ним, з рамени Округового Музею в Новым Санчы, во спілпрацы з Петром Трохановскым, выставу в новосандецкій ґалериі Стара Синаґоґа в 1984 році пн. Łemkowie-Лемкы. Была то выняткова выстава і нештоденна подія в сучасній істориі Лемків. Зорґанізувано першу велику выставу про Лемків, коли нихто одкрыто о них не бесідувал. На выставі вказано минуле Лемків, але, што важнійше, тіж іх сучасніст. Представлено континуум медже прошлым а будучым, вказуюче, же Лемкы не піддали ся асиміляциі. Експонаты удоступнило вельо державных інституций, головні музеів, але тіж Православна Парохія в Креници і приватны особы, м. ін. Ярослав і Петро Трохановскы, Павел Стефановскій, Теодор Ґоч, Зеновія Чергоняк ци Володислав Ґрабан. Допис Антония Крога ілюструваний єст фотоґрафіями проф. С. Лещыцкого, якы презентуваны были на реченій выставі.

Другій обшыр односячий ся до обшыри Лемковины, то статя Мацєя Сьлівы про вельолітній процес гляданя локалізациі табору барскых конфедератів над Высовом, якы злі записали ся в памяти місцевых жытелів.

51. номер «Плаю» єст дост обшырний – на 208 сторонах поміщено іщы аж 12 інчых дописів, тыкаючых карпатскых тем.