Таблиця в Меджелабірцях

Вчас 54. річника Фестівалю Культуры і Спорту в Меджелабірцях, в пятницю 24. червця/юнія, при участи декотрых бывшых участників Світовых Конґресів Русинів была одкрыта пропамятна таблиця, присвячена 25. річници од зорґанізуваня першого конґресу.

На таблици находит ся інскрипция в словацкым, анґлицкым і русиньскым языках: «В просторах того будинку в днях 23.-24. марця 1991 р. проходив 1-ый СВІТОВЫЙ КОНҐРЕС РУСИНІВ. Світова рада Русинів, Міджілабірці 24.06.2016 р.» Таблицю фундувал бургомайстер міста Меджелабірці – Владислав Вішньовскый. Єст она поміщена над входом до лабірского дому культуры, боком взглядом входу до Музею Модерной Штукы Енді Варголя. Як раз, в тій будові перед двадцет пятьома роками проходил і перший конґрес.

При вході до музею заімпровізувана была невелика сцена, на котрій одбывали ся концерты ріжных русиньскых выконавців, в тым чыслі медже інчыма такых артистів як Тріо Маґуровых, ґрупа Лабірчанка, Владислав Сивый, ци Ігор Куцер враз з Emotion Group.