Вызначный юбілей

Днесь ся дожывать 80 років жывота наш вызначный писатель, байкарь, педаґоґ, бывшый председа Сполку русиньскых писателів Словеньска – Миколай Ксеняк. Народив ся 4-го децембра 1933 року в селі Камюнка, старолюбовнянского окресу. Скінчів руську ґімназію в Пряшові і Інштітут руського языка і літературы в Празі. Довгы рокы учів на ґімназії в Ружемберку, на котрій быв  в роках 1968 – 1991 і єй директором. В 1981 році здобыв тітул ПгДр. на Універзіті Павла Йозефа Шафарика в Пряшові. Першы свої творы писав по руськы, пізніше по україньскы, але по 1989 р. і зачатку русиньского возроджіня зачав писати своїм материньскым, русиньскым языком. Його облюбленов темов є дротарство. За книгу „Біда Русинів з дому выганяла“ быв у 2003 році оціненый Літературнов премійов Александра Духновіча за русиньску літературу. Приповідку о дротарикові собі зась на своїй сцені мали можливость заграти акторы Театру Александра Духновіча. Словацькый літературный фонд оцінив його творчость Премійов  Александра Павловіча.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА