Рущане ся стрітнуть уж по 26-ый раз

В днях 1-го аж 3-го юла 2016-го року буде проходити вже 26-ый річник Стрічі родаків села Руське. Орґанізатором той културно-шпортово-сполоченьской події є Лісосельскогосподарьске і урбарьске общество фундушів Руське, котре має свій центер в місті Снина.

Головный проґрам на родаків із Руського, а і навщівників, чекать в суботу 2-го юла. В рамках културного проґраму буде мож видіти співацьку ґрупу Старинчанка, співацьку ґрупу Кычера, співацьку ґрупу Зарічанка, но і головным тяглом проґраму суть выступліня Дуа Мікі і Наталія Петрашовскы і ґрупы Traky. Окрім того навщівниці події можуть од пятніці брати участь і на шпортовых змаганях, припадно святковати тоту стрічу родаків недільнов святов літурґійов.

Русиньске село Руське находило ся в окресі Снина. У 1980-ім році было так як і далшы села той области насилно выселене рішаньом комуністічных властей із причіны будованя водной перегороды Старина, котра засобує водов на питя северовыход Словакії. Офіціално заникло у 1981-ім році.

Першый писемный документ о тім днесь вже неіснуючім селі походить із 1567-го року. Наперед належало гуменьскому панству, пізніше дакілько родинам. В Руськім всокотив ся сельскый цінтерь і каплічка, котра є на місці збуряной церькви із 1789-го року. Так само там зістав воєньскый цінтерь із 1-ой світовой войны і три домы. В середині села під цінтерьом доднесь стоїть хрест із 1955-го року. З кінця бывшого села веде доднесь камяна драга, градьска, із 1865-го року, тзв. Porta Rusica.

Днесь є без згоды родаків із Руського і маїтелів земли на теріторії села зрядженый Народный парк Полонины із найвысшым 5-ым ступньом охороны. На то, жебы могли люди вступити на свої фундушы, срітнути ся на земли своїх предків, мусять мати все выбавлене поволіня.

Фотоґрафія: blog.sme.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА