Сошетствіє Святого Духа – неділя, 09.00 год.

Ученици по Вознесіню перебывають на молтиві, очекують приход св. Духа. На 10. день по вознесіню тота обіцянка ся наповнять. Св. Дух сходить на апостолів в подобі огняных языків, абы припомянути, же єднота єдного языка при забытю на Бога довела до розділіня. Коли люди собі здумали поставити вежу, котра буде сягати до неба і поставити собі імя, тогды Господь помішав языкы і розділив народы, они перестали розуміти друг друга. Місце, котре мало быти тріумфалным свідчіньом лудьского ума, остало як смутне свідчіня того, же чоловік без Бога нич не зможе а вшытко веде лем до краху. Так теперь сходить св. Духа у виді огняных языків, абы розділене людьство знову зъєдинити. Апостолы зачінають говорити різныма языками і вшитко што посходили ся на тото видовиско їх розумлять. Бо св. Дух є Духом єдности. Він вытворять тоту правдиву єдность, котра є поставлена на іншых прінціпах. Єдность в Хрістови. Уж не важне, ці є хтось малый ці великый, богатый ці бідный, раб ці слободный.. З тым посолством євангелія апостолы поросходили ся по цілім світі. І мы просьме о наповніня св. Духом, абы сме были свідками той єдности св. Духа. Свідками взаємной любви. Свідками, же належыме Єдиному Господу Ісусу Хрісту. А то в світі, котрый є так настроєный протіив Хріста. Так атакує на вшытко, што є споєне з хрістіанством. Але св. Дух нам припоминать Хрістови слова. У світі будете мати трапліня, але довіряйте, я переміг світ. А жебы сьме в тім свідчіню вытримали аж до кінця нашого жывота. Слава Ісусу Хрісту!.

В неділю, 19-го червця/юна 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19-го червця/юна о 12.00, 15.00, 20.00 год. і 20-го червця/юна о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Ель Ґреко Ден Святой Трійці. Жрідло Wikipedia.