«Калейдоскоп Культур» во Вроцлаві. Лемків запрезентує «Розтока»

В найблизший вікенд, в днях 17.-18. червця/юнія т.р., во Вроцлаві буде проходил 9. фестіваль Калейдоскоп Культур. Фестівальова стріча, як все, одбуде ся на Слодовым Острові, де на сцені запрезентуют ся артисты ріжных народів і культур. Час-до-часу, вечерньом пором концерты будут проходити і в клюбі Старий Кляштор, де того рока одбуде ся одкрытя фестівалю.

Традицийом вроцлавского фестівалю є тото, же шторік якыса нацийональна ґрупа, або шырший культуровий круг домінує в рамках проходячых акций. Влони таком была карпатска обшыр, з великым натиском на лемківскы, бойківскы, закарпатскы і гірско-вшелеякы климаты. Товды же, нашу культуру презентували Сусанна, котрой небхідным пунктом каждого концерту є і русиньска співана поезия до слів Петра Мурянкы. Ден пізнійше Лемків репрезентуавли Дуляровы Братя та молодіжна ґрупа Припадок.

Тот рік фестіваль пройде під грецкы і пакістаньскы культуровы климаты. Як інфорумуют орґанізаторы, 9. річник фестівалю не без причыны ім посвячений. Увагу орґанізаторів звернули подіі, котры проходят фурт на Балканах і Близкым Сході, діткненых міґрантскым кризисом. Попри тым, як раз грецка культура буде в тым році домінувала, припоминаючы конец 40. років ХХ ст., коли то грецкы еміґранты нашли схороніня в комуністичній Польщы.

Хоц лемківскых климатів в тогорічній едициі буде меньше, і так найде ся час на презентацию нашой культуры. В суботу (18.06), в концертовій части медже 14.00 – 18.00 год. на сцені вкаже ся Фольклорний Ансамбль Розтока з Рудной на чужыні. Є то ґрупа, кота являт ся єдином днес фунґуючом на териториі любіньского повіту, котра презентує фольклор з рідной Лемковины. Ансамбль чыслит 22 співаків (головні жены) та 4-особову капелю. Артисты, окрем знаных лемківскых пісен, мают в репертуарі творы з украіньского, словацкого і польского фольклору. Стараньом Центру Культуры в Рудній, ансамбль купил в 2011 році традицийны лемківскы кроі, в котрых презентує ся не лем на лемківскых подіях (тот рік Розтоку буде мож видіти і на Лемківскій Ватрі на Чужыні). Ведучым лемківского ансамблю є Владимір Зорило.

Головным орґанізатором фестівалю Калейдоскоп Культур є Фундация Калейдоскоп Культур, котра являт ся як ініцятива медженародового діалоґу. Головна ціль той орґанізациі то едукация для взаімной толеранциі медже народами і етнічныма меншынами. Кульмінацийным пунктом цілорічной діяльности Фундациі єст як раз орґанізация медженародового фестівалю, котрий приближат жытелям Нижнього Шлеска традиці і культуру такых меншын як Німці, Росияне, Украінці, Жыди, Грекы, Ромы, Караімы, Болгары, Лемкы. Фундация Калейдоскоп Культур в великій мірі причынила ся до того, же і нас – Русинів зачали достерігати в столици Нижнього Шлеска.

To лем част зрыхтуваных атракций. Більше про тогорічний проґрам, в котрым находят ся не лем концертовы акценты – чытайте на офіцияльным сайті фестівалю.

Долов – концерт нашой Розтокы, найдений в сервісі YouTube.