О літню школу є інтерес як і на зачатку

В неділю 5-го юна 2016 р. святочно одкрыв ся 7-мый річник Studium Carpato-Ruthenorum 2016 – Міджінародной літньой школы русиньского языка і културы, котра є орґанізована Інштітутом русиньского языка і културы Пряшівской універзіты в Пряшові. Святочне одкрытя проходило в пряшівскім пензіоні Átrium. На културно-сполоченьскій події, котру модеровала акторка Театру Александра Духновіча в Пряшові Ярослава Сисакова, стрітили ся учітелі літньой школы, штуденты, но і представителі універзіты, міста ці державных орґанів.

Інтерес як і на зачатку

Тогорічна літня школа має штудентів із Словакії, Україны, Польщі, Булґарії, Сербії, Канады, Споєных штатів Америкы і Арґентіны. Міджі штудентами не суть лем люди русиньского походжіня, котры ся хотять зліпшыти в языку, но і нерусиньскы штуденты, докторанды, славісты, котры інтересують ся о русиньскый і язык і културу Русинів. Як підкреслив у своїм приговорі проф. Павел Роберт Маґочій, є барз важне, же о літню школу є все інтерес. Тот рік має докінця школа таку саму кількость штудентів, як їй першый річник. Studium Carpato-Ruthenorum має того року довєдна 24 штудентів – сім зо Словакії і сімнадцять загранічных штудентів.

Школу одкрыла директорка інштітуту

Вже традічно літню школу за головного орґанізатора – Інштітут русиньского языка і културы Пряшівской універзіты в Пряшові, одкрывала його директорка доц. ПгДр. Анна Плішкова, ПгД. Припомянула, же як Інштітут, так і літня школа може фунґовати і завдякы Міністерству школства Словацькой републікы, зато была рада, же першый раз в історії Studium Carpato-Ruthenorum на одкрытя пришов і представитель того резорту – державный секретарь Міністерства школства Петро Крайняк, котрый участных поздравив куртым приговором.

Поздравити тогорічных участників пришли і ректор Пряшівской універзіты проф. ПгДр. Петер Коня, повіреный директор Центру языків і култур народностных меншын Пряшівской універзіты, під котрый належыть і русиньскый інштітут, проф. ПгДр. Петер Каша, к. н., ці віцепріматор міста Пряшів Штефан Кужма. Кужма у своїм приговорі підкреслив, же Пряшів є културным центром Русинів жыючіх на теріторії Словацькой републікы.

Што є Studium Carpato-Ruthenorum

Міджінародна літня школа русиньского языка і културы Studium Carpato-Ruthenorum 2016 є орґанізована Інштітутом русиньского языка і културы Пряшівской універзіты. Вдяка тротыжденному едукачному проєкту Studium Carpato-Ruthenorum – Міджінародна літня школа русиньского языка і културы, в рамках котрого штуденты діставають лекції із языка, історії і етноґрафії в русиньскім і анґліцькім языках, Пряшівска універзіта є єдинов універзітов на світі, котра зареаґовала на інтерес o таку форму навчаня русиньского языка і културы з боку домашніх і загранічных адептів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА