«Спомний собі Лемку» – Катрена Гоць народжена в Ізбах – віторок, 20.00 год.

Днес запрашам на бесіду з Катреном Гоць (з д. Поляньска), котра народила ся в 1922 році в Ізбах – селі положеным на західній Лемковині. Хоц наше інтервю дост короткє, думам, же оно істо цінне, предовшыткым як памятка для будучых ґенераций.

Катрена Гоць оповіст пару слів про рідне село, м.ін. про тото, же была крещена іщы як грекокатоличка, а од 1926 рока ціле село было православне. За молодых років – зо сміхом споминат – пасла коровы єґомостя Хыляка (поневоленого в Талергофі, єдного з міністрів уряду Руской Народной Республикы Лемків). В ізбяньскій школі вчыли по польскы і по рускы. Вчас ІІ Світовой Войны была на примусовых роботах в Німцях. Спомне про факт писаня ся декотрых селян на выізд до Росиі. О рік по повороті з Німец пришло выгняня 1947 рока. Мужа Катрены Гоць вязнили 9 місяців з Явожні. Транспорт з більшістю Ізбян заіхал на стацию в Ліґници, де пак – з примусу – мусіло ся зачати нове жытя… 

Наше інтервю было награне в рамках зниманя сцен до документального фільму про Акцию «Вісла», котрого продукция іщы тырват, а сподівана премєра буде проходила в єй неславну 70. річницю.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу. Сес проґрам то поворот до втраченого лемківского щестя.