Лемківска церков в Івано-Франківску высвячена – проґрам «70 процент» – субота, 20.00 год.

22. мая т.р., в Івано-Франківску одбыло ся посвячыня нового грекокатолицкого храму. Чын высвячыня завершыл Архієпископ і Митрополита Івано-Франківскій Кыр Володимир (Війтишын). Церков святых словяньскых апостолів Кірила і Методия частійше называют просто «лемківска церков», прото же своім архітектонічным стильом навязує до лемківскых храмів, а і будівничыма были Лемкы. Самы Лемкы то переважаюча част парафіян, а ініциятором будовы был лемківскій священник – о. Анатолій Дуда-Квасняк.

В 2002 році на пляцу де стоіт церков (ул. Галицка)  заплянувано поставити пропамятний знак Украінцям выселеным з Польщы в роках 1944-46. З той причыны остал оголошений конкурс проєктів, котрий доднес являт ся незреалізуваным. Зато, лемківскій парох з Монастыриск запропонувал в місце памятника поставити невелику церков.

Дост долго тырвало зрыхтуваня необхідніх документів, м.ін. здобываня позволінь на будову. Долго і будувала ся тота невелика церков – фундаторамы были самы вірны. Прото ден посвячыня был великом радістю для вшыткых. На торжество зьіхало ся гідні люди не лем з Івано-Франківской области, але  тіж з Львівской і Тернопільской, а дахто пришол і з дальшых сторін.

Для тых, котры не мали змогы приіхати – днес даєме можливіст быти присутным на реченым посвячыню.