Капеля Липка з Русинами по сусідскы

В остатню суботу в Чешскым Тешыні одбыла ся промоция платні пн. «В єдным кругу» знаной і любленой на Тешынскым Шлеску капелі «Липка», котра діє в Яблункові при Польскым Культурно-Освітовым Стоваришыню в Чешскій Республиці. Членами той ґрупы сут Кристиян Гечко, Войта Паздера, Мариян Мазур і Ондра Паздера. 21. мая 2016 рока в корчмі «Блідий свит» в Тешыні гудакы заграли концерт, а были облечены не як все – в ґуральскы кроі, лем як кельнеры. Капеля «Липка» не лем дала шумний концерт, але было тіж дуже оповідань і фиґлів, а забава тырвала до блідого рана.

Платню «В єдным кругу» мож си купити на концертах, а окрем того пишучы до членів ансамблю. А чом пишеме о тій подіі на русиньскым портали? Музыкы «Липкы» награний на компакті репретуар поділили на штырі бльокы – «Наше» обнимат співанкы зо Шлезского Бескіду, «Ваше» – то творы выбраны фанами ґрупы, «Своє» – штырі авторскы і «По сусідскы». І в тій остатній части нашли ся дві добрі вшыткым знаны русиньскы співанкы – «Ганцю не дримай» і «А ты Меля», як стоіт написане, а окрем того найти ту мож єдну словацку співанку «Куляло са» і украіньску «Ой, чый то кін стоіт», котру мож послухати долов.