«Спомний собі Лемку» – дальша бесіда з Євгенійом Ковальском (з д. Габура) з Фльоринкы – понедільок, 20.00 год.

Запрашам до выслуханя дальшой части бесіды з п. Євгенійом Ковальском (з д. Габура), родом зо славной столиці – Фльоринкы. Од першой части нашой бесіды мунуло уж кусіся часу, але кєд мате дяку сові одсвіжыти тамто інтервю, то заохочам одвидіти наш радийовий архів – подкасты. Гын найдете, не лем сес одтинок, але і вшыткы інчы проґрамы, котры можете чути в рамках циклю «Спомний собі Лемку».

Остатню част скінчыли сме на темі, тыкаючій облечыня, котре перед выселіньом носили Лемкы. Олена Дуць, котра провела бесіду з п. Ковальском, звідувала про загальны інформациі доторкаючы єй рідного села. Днес буде подібні, звідаме про нарядя штоденного хоснуваня, сельского коваля, оліярню, фолюш, ци млин. Дознате ся і того, што ся іло в тамтых часах – істо было то здорове ідло. А може знате, што то тертяникы, палята? Велия на Лемковині тіж была ліпша як днес, а обычаів з ньом звязаных є досправды вельо. А весіля? Весіля было гідне, аж і пришли на него німецкы воякы. Но, а на фльориньскій плебаніі было радийо. Лем кус подібне до нашого.

Євгенія Ковальска в 1947 році мала лем 21 років. Была вязнена вчас выселінь до Росиі, прото же не годила ся на добровільний выізд. Вєдно з православным та грекокатолицкым єґомостями з Фльоринкы остала поневолена на тыжден в ґрибівскій взязници. Товды молода жена была бременна. Не лем єй вязнили. Мужа Андрия тіж заперли.

Кєд хочете дознати ся того, што горі, але і інчых цікавых інформаций – слухайте в днешній вечер проґрам «Спомний собі Лемку».

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу. Сес проґрам то поворот до втраченого лемківского щестя.

фот. грекокатилицка церков во Фльоринці; джерело: www.static.panoramio.com