Турне з пєсом «Короткій зарис вшыткого»

В лютым/фебруари т.р., заявляли сме на нашым портали о новаторскым проєкті Лемка – Тео Думского, котрий явил ся в виді театральной пєсы пн. «Короткій зарис вшыткого». Премєра одбыла ся 4. лютого/фебруара т.р. во вроцлавскым Кіні Новы Горизонты. Тепер ґрупа Cloud Theater заявила, же зо своім спектакльом рушат в турне по Польщы.

Уж заран, т.є. 19. мая, «Короткій зарис вшыткого» буде мож видіти на Підляшу – в Білостоці, в рамках Днів Сучасной Штукы. Пак, проєкт поіхат 7. червця/юнія до Франкфурту над Одром (Німці), а до Польщы «Короткій зарис вшыткого» верне 12. червця/юнія, коли то пєсу буде мож видіти в варшавскым Кіні Прага (о чым детальнійше інформували сме на нашым портали).

Режысером спектаклю є Владимір Хомяк, котрий діє під псевдонімом Тео Думксій. То абсольвент Державной Высшой Театральной Школы ім. Л. Сольского во Вроцлаві. Представлят ся як незалежний артиста, котрий, окрем сценічной діяльности, занимат ся досліджуваньом і вчыньом акторскых технік на фоні психолоґічных та духовых наук. «Короткій зарис вшыткого» то найновше представліня Тео Думского і при тым подія, котра інавґурує проєкт Cloud Theater (Театр в хмарі). Автор звязаний єст з середовиском Стоваришыня Лемків. В студентскых часах был конферансиєром на Лемківскых Ватрах в Михалові. Там же одбыла ся премєра єдного з його короткометражовых фільмів, пн. Был єм гев, котрий вказувал артистичну візию гляданя достоменности молодым чловеком, дознаючого ся, же єст Лемком.

Детальні про пєсу писали сме на нашым портали (в лемківскым та польскым языках), але тіж можете чытати обшырний текст в 5. номері панрусиньского тыжденника лем.фм +.

Аванґардовий спектакль, котрий лучыт присутніст жывого актора з кінематоґрафічныма техніками, дополненыма твореном на очах обзераючых рисункову сценоґрафію. Істория Світа оповіджена без хоснуваня слів.