День музеїв з Варголом

Од 1977-го року святкує комуніта музейників 18-го мая Міджінародный день музеїв. Векшына музеїв почас вікенду коло того терміну приготовлює множество актівностей про навщівників, жебы вєдно із нима святковали своє існованя і підкреслили значіня такых орґанізацій в сполочности. На Словакії ся тото свято припоминать шторік успішным проєктом під назвов Ніч музеїв і ґалерій. Втогды многы музеї і ґалерії зіставають одкрыты до пізных ночных годин.

Музей Модерного уменя Енді Варгола в Міджілабірцях, котрый того року буде святковати 25 років свого існованя, тот рік змова приготовив свій атрактівный проґрам як раз на 18-го мая, коли свій датум в календарі має Міджінародный день музеїв. Музей буде бесплатно одкрытый навщівникам од 10.00 год. до 18.00 год.

Богатый проґрам будуть творити екскурзії по музею із лекціов професіоналного робітника музею (о 10.00 год., 13.00 год., 15.00 год. і 17.00 год.), чекать на вас і Kino Andy, в рамках котрого можете видіти філмы о кральови поп-арту Ендім Варголови, і як каждый рік не буде браковати ани Spray Painting Andy’s T-shirt – варштат, на котрый собі каждый може принести своє трічко (кошульку) і на нього собі може зробити мотів повязаный із Вароголом ці його творчостьов. Далшым варштатом, на котрім участны можуть брати учать, має назву Крок за кроком, фарба ку фарбі…

Кідь вас інтересує творчость найзнамішого Русина у світі Енді Варгола, маєте інтерес посмотрити собі його творы в музею в Міджілабірцях, а хочете вєдно з тым і забавити ся, маєте найліпшу принагоду іти до музею Варгола 18-го мая на Міджінародный день музеїв.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА