Во Вільнюс і Русин

Кінцьом новембра одбуде ся во Вільнюс Саміт выходного партнерства. На нім бы мало прийти і ку підпису асоціачного договору з Українов. Окрім Україны ся на подібне зближіня з Европсков унійов тішыть і Ґрузія ці Молдавія. Про нас є потішуюче, же на саміт є як позорователь позваный і вызначный політолоґ русиньского походжіня Александер Дулеба.

Доц. ПгДр. Александер Дулеба, к.н. ся народив 5. октобра 1966 р. у Свіднику. Як о собі сам повів, є стопроцентный Русин. Освіту здобыв на Київській державній універзіті Т. Г. Шевченка, докторат зробив на Універзіті Коменьского в Братіславі і кандідатом наук ся став на Словацькій академії наук. Быв на многых заграничных стажах. Орьєнтує ся на баданя міджінародных одношінь, заграничну політіку Словакії, внутрішню і заграничну політіку держав выходной Европы, головно на їх одношіня до Европской унії. Дійствує в Словацькій громаді про заграничну політіку, передавать лекції на Пряшівскій універзіті. Од року 2013 є председом Округлого стола Русинів Словеньска.

Петро Медвідь, Пряшів

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА