Реконштрукція русиньского музею бы могла зачати у 2017-ім р.

Словацькый народный музей – Музей русиньской културы в Пряшові выиникнув 1-го януара 2007-го року на основі рішіня Міністерства културы Словацькой републікы. Наперед быв у арендованых комерчных просторах. Кінцьом 2011-го рока музей переводом маєтку із Міністерства обраны Словацькой републікы дістав бывшы касарні, чім ся здобыла будова, котра має служыти як просторы музею.

Здобытя новых просторів значіло і то, же музей быв до децембра 2013-го року про людей цалком запертый. Од того часу є одкрытый, но фунґує в обмеженім режімі. Напрік тому музей понукать дочасны і штири сталы експозіції. Лем недавно прибыла експозіція, котра документує Підкарпатьску Русь у 30-тых роках 20-го столітя.

Бывшы касарні суть творены трьома обєктами, із котрых два суть із 19-го столітя і не были довго реконштруованы. Так само не суть просторы приготовлены на ґалерійну і музейну діяльность. Од здобытя новых просторів директорка Словацького народного музею – Музею русиньской културы Ольґа Ґлосікова має намагу здобыти фінананції на проєктову документацію і наслідну реконштрукцію будовы. Як повіла директорка Ґлосікова  в остатніх днях про словацьку пресову аґентуру SITA, думать собі, же перша фаза реконштрукції бы могла зачати у 2017-ім році.

Ставебный замір є подля слов Ґлосіковой в сучасности на Міністерстві културы Словацькой републікы, котре є зряджовательом Словацького народного музею і вшыткых його одділінь. Міністерство вырішыть і приділіню 210-ох тісячів евр потрібных на выпрацованя проєктовой документації, котра детайлно встановить роботы і кошты, і без котрой не може зачати ся реконштрукція. „У ідеалнім припаді бы ся перша із пятьох етап обновы центру музею могла зачати на будучій рік“, інформовала Ґлосікова.

„Намагов музею є штоскоріше зачати із реконштрукчныма роботами в інтерьєрі і екстерьєрі будовы, жебы вытворити условії про іншталацію росшыреных експозіцій і новых выставок, котры бы презентовали жывот і традіції Русинів. Зреконштруованы просторы понукнуть бібліотекарьскы, бадательскы ці архівны службы заінтересованым, як і різны културно-освітні події про вшыткы віковы катеґорії“, обіцять офіціалный інтернетовый сайт музею.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА