Молодий Лемко фіналистом загальнопольской ґеоґрафічной олимпіяды

Мило нам заявити про успіх єдного молодого Лемка – Павла Стариньского, ученика ІІ Загальноосвітного Ліцею ім. Станіслава Выспяньского в Ліґници, котрий остал фіналистом загальнопольской ґеоґрафічной олимпіяды! На початок додаме лем тілько, же то не єдиний успіх того ученика, але о тым ниже.

Центральны змаганя загальнопольской ґеоґрафічной олимпіяды проходили в днях 21.-24. квітня/апріля т.р., в Хожові. Фінальна част олимпіяды складала ся з двох етапів. В першым – писемным, ученник мусіл вказати своє знаня нт. аналізы мап, ґрафів, діаґрамів та лучыня інформаций з ріжных части наук. Друга част – то уж тереновы змаганя, вчас котрых, при схоснуваню модерного інформатично-технічного ґратя, Павел описувал терен, а попри тым выказувал ся знаньом працы в дружыні.

Як бесідує Павел – […] з том олимпіядом не так просто, прото же в цілій Польщы занял єм, што правда, 33. місце, але завдякы тому, же єм фіналистом, єм уж освободжений од писаня тогорічного матурального еґзаміну з ґеоґрафіі, што значыт, же отримую з того предмету результат, зарахуваний на 100% пунктів […]. Окрем зарахуваной в олимпійскым трибі матурі ґеоґрафіі, Павел буде того рока здавал іспыты м.ін. з математикы, анґлицкого та німецкого языків.

Ученик долго думал над матуральным іспытом з лемківского языка, але конец-кіњцьом зрезиґнувал з той можливости, як бесідує кус несміло – не за добрі ся чую в писаным лемківскым языку. Припомнийме, же то в його школі перший раз в Польщы была писана перша матура з лемківского языка. Од 2013 рока четверо матурантів підышло до іспыту з лемківского языка (3 хлопців і 1 дівча), але уж тепер можеме поіфнормувати, же до того ексклюзивного чысла долучыт в маю друга школярка, котра матуральной еґзамін з лемківского языка буде здавала в Ґлоґові. Звідали сме тіж про будучы пляны Павла Стариньского – […] кєд ся поведе, хотіл бы-м зложыти папері до Головной Гандльовой Школы в Варваші [Szkoła Główna Handlowa, SGH – прип. ред.]. Опікунком фіналисты в зaгальнопольскій олимпіяді была його учытелька ґеоґрафіі, Беата Куця.

В влонишнім інтервю для лем.фм, Павел Стариньскій бесідувал же школа, до якой ходит, є выняткова, як іде о підхід до Лемків, а і самы лемківскы школярі активні діют в жытю школы, то і не без причыны єст о Лемках голосно, не лем про смомянуту уж історичну, першу матуру з лемківского языка.

Павел, окрем своіх математично-фізичных заінтересувань, цікавит ся тіж історийом і ґеоґрафійом. Попри тым, єст членом Лемківского Ансамблю Пісні і Танця Кычера, з котрым зъіхал уж добрий фалаток світа. Гоббистичні вчыт ся церківнославяньского языка при Осередку Співу Церківнославяньского Языка в Цєпліцах, котра, помедже інчыма, має задучу приготовити будучых дяків до служыня в парафіях вроцлавско-щеціньской єпархіі ПАПЦ.

Корені П. Стариньского выводят ся м.ін. з середньой Лемковины (села Ізбы і Фльоринка), але – як споминат ученик – нашли бы ся і в східньолемківскій Зындранові.

Вертаючы до успіхів, про котры спомнено на зачатку тексту, Павел Стариньскій то тіж двократний лавреат Загальнопольского Статистичного Конкурсу, на котрым занял другє місце в Польщы. З тым успіхом вяжут ся і дальшы поводжыня молодого Лемка з ліґницкого ліцею, зато же влони был угоноруваний стипендийом Презеса Рады Міністрів за загальны успіхы в шкільным та позашкільным вымірі. Товды же, при нагоді стрічы з премєр Польщы – Євом Копач, Павел запросил єй до спільной знимкы, на котрій (як видно долов) польска Презес Рады Міністірів тримат лемківску фану, на котрій находит ся русиньскій медвід.

фот. архів П. Стариньского; головна знимка выконана на Блендовскій Пустыни вчас фінального етапу олимпіяды.