В Проґрамовім выголошіню влады Словацькой републікы є і русиньске школство

Днесь быв публікованый текст Проґрамового выголошіня влады Словацькой републікы на найблизшы штири рокы. Влада на основі свого проґрамового выголошіня буде жадати о довіру в Народній раді Словацькой реппулікы.

Владу, котра буде жадати довіру в парламенті творять штири політічны партії: Smer – SD, Slovenská národná strana, Most-Híd i партія Sieť. Текст Проґрамового выголошіня влады днесь як першый публіковала словацька ґазета Denník N.

Выголошіня є розділене до 5-ох пунктів:  1. Посилнити сполоченьску і політічну стабіліту, 2. Флексібілно реаґовати на нагоды і неґатіва вонькашнього оточіня, 3. Плынуло продовжовати в підпорі господарьского, соціалного і енвіроменталного розвитку країны, 4. Проглубити господарьску, соціалну і теріторіалну соналежность Словакії, 5. Посилнити задачу державы і охрану верейного інтересу. Тоты пункты мають свої підстаті.

Проґрам новой влады занимать ся і вопросами народностных меншын. В рамках 4-го пункту, котрый має назву Проглубити господарьску, соціалну і теріторіалну соналежность Словакії находить ся і статя під назвов Політіка підпоры народностных меншын. В ній ся, окрім далшых іншых справ, котры ся дотуляють народностных меншын, прямо споминать і замір влады підпорити русиньске школство. Русиньске школство є єдине, о котрім ся у выголошіню пише конкретно.

Влада подля документу „выпрацує концепцію розвитку навчаня русиньского языка і културы в матерьскых школах, основных школах і середніх школах.“ В ставі, кідь майже нияк нефунґують першы два ступени освіты і русиньске середнє школство не існує абсолутно, тот замір новой влады  може быти надійов про Русинів на Словакії.

В рамках підпоры меншын документ так само обсягує, же влада підпорить вынята малокласных школ на языково змішаній теріторії із обовязковых квот, котры ся мають подля закона дотуляти мінімалной кількости дітей на то, жебы могла школа існовати. То є так само важный пункт з погляду Русинів, кідьже моментално суть лем дві основны школы з навчалным языком русиньскым на Словакії, і кібы народностны школы не были выняты зо закона, значіло бы то, кідьже є дітей на русиньскых селах штораз менше, конець русиньского школства.

Як сьме скоріше інформовали, позіцію державного тайомника на Міністерстві школства Словацькой републікы дістав Петро Крайняк із партії Most-Híd, котрый є довгорічным русиньскым актівістом. Пункты, котры суть обсягнуты в Проґрамовім выголошіню влады, были пропоновати як раз тов політічнов партійов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА