Іван Міклош може быти міністром на Україні

По 1989-ім році быв єдным із мала людей, котры розуміли словацькому (чехословацькому) торгу і економіці. Вецераз быв членом влады, мав функції у світовых і европскых інштітуціях. З його меном суть повязаны важны економічны реформы, котры одштартовали по 1998-ім році, коли скінчів во владі Владимір Мечіяр. Русин Іван Міклош має теперь понуку робити міністра фінанцій на Україні.

Реформы, котры робив в словацькых владах бы теперь од нього хотіли і на Україні. У тотых парламентных выборах на Словакії не кандідовав, і про словацькы медії повів, же дав згоду на то, жебы вступив до новой україньской влады як віцепремєр і міністер фінанцій. О тім мав особно їднати з україньскым презідентом Петром Порошенком і його кандідатом на премєра, кідьже влада Арсенія Яценюка стратила векшыну в парламенті, сучасным председом парламенту Володиміром Гройсманом.

Не хоче прийти о обчаньство

Міклош понуку прияв з тым, же до функції піде лем кідь му зістане державне обчаньство Словацькой републікы. Кідьже на Словакії платить закон, же здобытьом іншого обчаньства страчать чоловік обчаньство словацьке, і на другім боці є на Україні платный закон, же членом влады може быти лем граждан Україны, Міклош в тім видить реалный проблем, бо, як повів, страта словацького обчаньства бы про нього была нездолательнов барьєров про вступ до нового владного кабінету на Україні.

„Технічны“ можливости на рішіня того проблему суть дві. Партії Most-Híd ся почас другой влады Роберта Фіца подарило протиснути в парламенті, жебы было можливе жадати міністра внутрішчніх справ о выняток зо закона, і так зохабити собі словацьке обчаньство і по здобытю іншого державного обчаньства. Другов можливостьов є, жебы Україна наскоро прияла закон, котрый бы уможнив быти членом влады і людям, котры не мають україньске обчаньство. І по вірішіню того проблему Міклош про медії повів, же покля має быти міністром, буде жадати і сповніня дакотрых проґрамовых условій. Тоты близше не шпеціфіковав.

Міклош бы не быв першым, хто бы пришов до україньской влады „звонка“. У дотеперішній владі Арсенія Яценюка были міністерка фінанцій Наталі Яреско, котра ся народила в Споєных штатах Америкы (Іван Міклош їй робив теперь порадцю), міністер господарьства Аіварас Абромачічіюс, котрый походить із Літвы а Александер Квіташвілі, котрый быв перед тым міністром здравотницьтва в Ґрузії.

Одтеперь єм Русин

Покля бы ся став Іван Міклош міністром фінанцій і віцепремєром у новій україньскій владі, якбач бы ішло о найвысше поставленого Русина на Україні, котрый ся ку свому походжіню гордо голосить.

У 2011-ім році собі записав русиньску народность і в кампані перед переписом неселіня о тім одкрыто говорив. Про словацькый тыжденник .týždeň в розговорі під назовов „Одтеперь єм Русин“, котрый з ним робили у 2011-ім році втогдышні редакторы часопису Йозеф Майхрак і Ярослав Данішка, Міклош говорив:

„Має то таку чудну історію. Обидвоми мої родічі были Русины, но я єм собі все писав словацьку народность. Може і зато, же єм ку тому ани не быв выховльованый, но і зато, же почас комунізма не існовала русиньска народность, а лем україньска. Теперь ня ословили русиньскы оґанізації і усвідомив єм собі, же кідь обидвоми мої родічі были Русины, та і я єм бізовно Русином. І єм ся ку тому гордо приголосив.“

Далше Міклош на вопрос, ці бісідує по русиньскы, продовжує: „Не бісідую, але вшытко розумію. Мої стары родічі, ку котрым єм доста часто ходив, бісідовали по русиньскы. Но я вже выростав у Михалівцях, Рожняві і головно у Вранові над Топльов, де ся бісідує скоріше по земпліньскы. Значіть, знам гуторец, но вже не знам бісідовати.“

Хто є Іван Міклош

Інж. Іван Мікклош ся народив 2-го юна 1960-го року у Свіднику. Є словацькым економом русиньского походжіня. Почас його діяня у двох словацькых владах Микулаша Дзурінды (рр. 1998 – 2002 і 2002 – 2006) Словакія зназначіла дакілько успіхів, міджі котры належыть вступ до OECD, NATO і Европской Унії. Знамым ся став як підпредседа влады про економіку (рр. 1998 – 2002) і почас його міністрованя на міністерстві фінанцій (рр. 2002 – 2006). Під його веджіньом зробило ся много економічных реформ і Словакію в тім часі зачали называти „Татраньскым тіґром“, кідьже вдяка реформам пришли многы загранічны інвестіції і знижыла ся безробітность, чім ся Словакія зарадила міджі найскоріше роснуче економікы в Европскій унії.

В рамках партійной приналежности быв Міклош в рр. 1992 – 1993 першым підпредседом партії під назвов Občianska a demokratická únia, в рр. 1993 – 2000 быв у партії під назвов Demkokratická strana, де быв єден час і председом. Од року 2001 до року 2014 быв членом партії Микулаша Дзурінды під назвов Slovenská demokratická a kresťanská únia – Demokratická strana. З партії в році 2014 одышов вєдно із Дзуріндом.

Першыраз быв міністром в роках 1991 – 1992, коли рядив Міністерство пріватізації Словацькой републікы. В рр. 1998 – 2002 быв підпредседом влады про економіку. В роках 2002 аж 2006 быв підпредседом влады і міністром фінанцій, таку саму функцію мав потім і у владі Іветы Радічовой в рр. 2010 аж 2012.

Окрім того быв ґувернером Світовой банкы за Словакію (1998 – 2002), ґувернером Міджінародного валутового фонду за Словакію (2002 – 2006), ґувернером Европской банкы про обнову і розвой за Словакію (2002 . 2006) і членом Рады міністрів фінанцій Европской унії – ECOFIN (2003 – 2006).

Жрідло фотоґрафії: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА