Вышол панрусиньскій тыжденник! Так – тыжденник!

Братя Лемкы! Што сте хтіли – мате. Такє речыня нашли Русины на першій стороні, выдаваного од січня/януара 1911 р., першого номера часопису «Лемко», котрий по періоді царствуваня язычія, якє по церковно-славяньскым языку выполняло функцию літературного языка Русинів, был першым по пілнічній страні Карпат періодиком, выдаваным на языцѣ наближенномъ до лемковского говора.

105 років од тамтого часу, 25 років од основаня Стоваришыня Руска Бурса і 5 років од моменту, коли в інтернетовым ефірі вызвучал перший сиґнал радия лем.фм, і мы – Вам, братя Русины – приносиме тото, што сте захотіли. Даєме Вам до рук перший номер русиньского тыжденника ЛЕМ.фм+, котрий не знат границ. Ани політичных, ани соспільных, ани тых, котры вшелеякы нечысты силы минулых епох прібували нам поставити.

Жыєме в такых часах, де рынок не любит діры, зато мы тоту діру выполниме. Знате нас уж дост добрі, бо чытате порталь lem.fm, слухате наше радийо, але загальнорусиньскій тыжденник, котрий зломит речены границі, был нашом мрийом до все. Тепер же – єст ачий амбіцийом змістити думкы, опініі, вісти і подіі русиньского світа од Ужгорода до Щавниці (як писал наш Учытель – Іван Русенко), на полудне од Карпатской Руси, за Великом Водом і всяди там, де буд-коли станула русиньска нога, або полетіли русиньскы мысли. Очывидно, вкажеме Вам важнійшы статі з нашого порталю, заповіме, або припомнеме дашто з нашого радия, але головном цілю являт ся такій часопис, котрий не дублює портальово-радийовой формы, лем, творячы синерґічний ефект, дополнит простір русиньскых медий в виді статій і материялів, котры в інчых місяцх моглы бы быти недостережены.

Днешній, інтернетовий світ уж давно не знат границ. Они істнуют лем в нашых головах, будучы неприродным нашым часам атавізмом, рефлексом минулого. Мы уж давно о них забыли, зато тепер маме гідні силы, жебы давати Вам реґулярны інформациі о тым, што ся діє ту і там, гын і гев. Медияльна ґрупа лем.фм од початку свого істнуваня спілпрацує з вельома партнерами, русиньскыма орґанізациями в Европі і Пілнічній Америці, найважнійшыма русиньскыма медиями: редакциями «Бесіды», «Інфо Русина», «Русина», «Народных новинок», радийом Русин.фм і вельома інчыма інституциями, котры, діючы на хосен вшыткых Русинів, ден-по-ден намагают ся протиставити сучасным асиміляцийным і інчым процесам.

Тепер, на сам початок, на доказ того, же мы уж давно зрушыли границі, передаєме Вам до почытаня статі, написаны авторами з Лемковины, Пряшівской і Підкарпатской Руси. І дальше, як співала колиси в народній пісни велика «Лемковина», будеме ламати, будеме торгати з конарями. А там, де велька мочар – преложыме дручкы і прейдеме помалючкы…

Зато, кєд лем хочете, можете прилучыти ся до нас. До спілпрацы просиме вшыткых, што пишут, рисуют, фотоґрафуют, єдным словом – творят.

А днес – пізрийте на загальнорусиньскій тыжденник ЛЕМ.фм+. Він, тепер іщы, выходит лем в цифровым виді. Іщы лем тепер…

То лем вводне шефредакторскє слово першого номера панрусиньского тыжденника ЛЕМ.фм+. Неодолга часопис найдете на нашым портали lem.fm – по лівій його страні. Дописуйте свій е-майльовий адрес до листы – товды будете го мати іщы перед тым, нич офіцияльні явит ся на портали. Уж тепер можете клікнути в тот мотузок, жебы чытати полну версию нашого панрусиньского тыжденника, а кєд бы сте хотіли до нас написати – най же адрес tyzdennyk@lem.fm буде Вам близкій!