4-тый річник Фестівалу културы Русинів Словеньска вже має свій датум

4-тый річник Фестівалу културы Русинів Словеньска, котрый у Свіднику орґанізує Окресна орґанізація Русьньской оброды у Свіднику буде тот рік проходити в днях 23-го аж 29-го мая. Тікеты ся дають купити уж теперь на дакілько продайных місцях в Пряшівскім краї, но так само і через інтернет.

Русиньскый фестівал у Свіднику, котрый має підназву „Од Русинів про вшыткых“ знова принесе тыждньову мултіжандрову проглядку домашніх і загранічных выступаючіх. Супроводны події, котры будуть проходити через тыждень, будуть знова бесплатны і фестівал завершыть ся вікендовым проґрамом на свідницькім амфітеатрі. Култура Русинів буде презентована в подобі театралных пєс, філмовых проєкцій, бісід, выступлінь фолклорных ансамблів і далшых музичных, співацькых і танечных ґруп. Головный проґрам на амфітеатрі буде од пятніці 27-го мая до неділі 29-го мая 2016-го року.

Тікеты на вшыткы три дні головного проґраму собі можете через інтернет купити на порталі Tickeportal уж теперь. До 30-го апріля є ціна тікету на три дні лем 3 €. За 5 € буде мож купити тікеты до 22-го мая, потім ся будуть тікеты продавати за 7 €.

Як пишуть орґанізаторы на своїм сайті, єднов із головных думок фестівалу, котрый орґанізують од 2013-го рока, є намага Русинів вказати, якы досправды суть. Народом приготовленым поділити ся о своє културне богатство і вєдно з тым народом одкрытым нагоді поучіти ся із традіцій, скушеностей і прямованя народів і култур іншых. І зато є головным одказом взаємна толеранція і решпект, співпраца і іншпірація меджі Русинами і далшыма етніками, котра має помагати утриманю своїх унікатных традіцій і културы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА