Пряшівскый край має уж і русиньску верзію свого сайту

Пряшівскый самосправный край є найвекшым крайом Словакії і вєдно з тым є і крайом, де жыє найвекша кіклькость Русинів в рамках Словакії. Недавно ку словацькій, анґліцькій, німецькій, французькій, польскій, російскій і мадярьскій языковым верзіям сайту прибыла і русиньска мутація.

Русиньску верзію творять три головны секції, котры мають під собов далшы рубрікы. Русиньскый навщивник сайту ся так може дізнати вшыткы основны інформації о краї, но так само ся може дочітати і о різных інтересностях і памятках, котры ся находять в Пряшівскім краї.

„Важены навщівници, вітайте на інтернетовій сторінці Пряшівского самосправного краю. Наш край, мімоходом, найлюднатішый на Словакії, може ся пышыти богатством історічных памяток, а таксамо природныма унікатами. Найбівшым чіслом памяток, записаных в списку УНЕСКО, як і найчістішов, найнепорушенішов природов в рамках Словакії ся пышить таксамо Пряшівскый самосправный край. Тото вшытко Вам хочеме представити на нашій сторінці, котру сьме розділили на три тематічны секції – в першій інформуєме о подіях в реґіоналній самосправі, в другій суть уведжены факты о нашім краю а в третій будете мочі спознати найкрасшы і найінтереснішы міста реґіону. Віриме, же наша сторінка Вам дасть вшыткы інформації, котры глядаєте,“ пригварять ся на інтернетовім сайті председа Пряшівского самосправного краю Петер Худік.

Сайт Пряшівского самосправного краю може іти прикладом про далшы сайты міст ці сел. Подля закона бы основны урядны інформації в селах ці містах, де жыє над 20 процентів жытелів, якы належать ку народностній меншыні, мали быти к діспозіції і в материньскім языку той котрой меншыны. Тото платить і про інтернетовы сайты, котры належать такым селам і містам. Реалность є така, же тот обовязок зо закона собі села і міста, де ся приголосило холем 20 процентів Русинів, не дотримують і вшыткы інформації суть публікованы лем в словацькім языку.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫК