Владыка Орест (Чорняк)

Православна церьков в Америці мала споміджі Русинів дакілько архіпастырів. Найзнамышыма суть якбач святый Алексій Товт, родак зо села Кобылниця на Словакії ці метрополіта Лавр, котрый походив зо села Ладомирова, таксамо днешня Словакія. Уж менше ся знать о Орестови Чорнякови, котрый ся народив в селі Отрутьова 11-го юла 1883 року. Того року собі припоминаме точно 130 років од його народжіня.

Орест Чорняк по закінчіню пряшівской Ґрекокатолицькой богословской семінарії быв высвяченый за священика. Вєдно з далшыма священиками одишов в 1906 році до Америкы, жебы духовно служыв серед Русинів, якы там выселили ся за роботов. Веце як 30 років быв священиком у церькви св. Йоана Крестителя в місті Бріджпорт в штаті Конектікат, што была втогды найвекша ґрекокатолицька, пізніше православна парохія в Споєных штатах Америкы. В тридцятых рока отець Чорняк зачав бойовати проти ґрекокатолицького єпископа Василя Такача. Він, на основі пожадавок Рима, перестав святити женатых кандідатів на священьство і завів недобровольный целібат міджі ґрекокатолицькым духовенством. То ся стрітило з невольов нелем священиків, але і людей.

В новембрі 1937 року конґрес священиків і віруючіх, якы не были спокійны зо сітуаційов в церькви, потвердив заснованя Америцькой карпаторуськой православной ґрекокатолицькой єпархії і выбрав отця Ореста Чорняка за єй першого єпископа. Тота вольба была потверджена екуменічным патріархом Константинопола. 18-го септембра 1938 року быв выголошеный Святым сінодом конштантинопольского патріархату за єпископа Аґафонійского про веджіня Америцькой карпаторуськой православной єпархії і быв рукополженый метрополітами – сардійскым Германом, ірінопольскым Константином і лаодікійскым Дорофейом.

В 1950 році преосвященый владыка Орест переніс центер єпархії до Джонставну в штаті Пенсілванія. О рік пізніше там засновав і православну семінарію. 1-го януара 1966 року му быв приділеный тітул метрополіту. Владыка Орест вмер 17-го фебруара 1977 р.

Петро Медвідь

Жрідла: Енциклопедія історії та культури карпатьских русинів, wikipedia

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА