Реляция з 30. річниці одроджыня православной перемышльской єпархіі

Запрашаме на реляцию з празднуваня 30. річниці інґресу владыкы Адама на єпархіяльну катедру. 30 років тому назад был то історычний момент одроджыня православной перемышльской єпархіі (днес названой перемышльско-новосандецком). Як повіл сам архієпископ Адам, святкуваня той річниці мали быты скромны, але конкретны.
По Богослужыню, котре зачало ся о 9 год. рано, одспіваны были многолітствія, потім одслужено молебен перед Саноцком Чудотворном Іконом Божой Матери. По молитвах в Церкви, в готели Бона над Саном, проходила конференция. В Богослужыню і конференциі участвували Його Высокопреосвященьство, Высокопреосвященніший Кыр Адам, Архієпископ Перемышльскій і Новосандецкій, гіст з Украіны – професор архімандрита о. Віктор, ректор Ужгородской Украіньской Богословской Академіі та Карпатского Університету ім. Августина Волошына, уполноважнений УПЦ з выжшой освіты і наукы, котрий прибыл до Санока з благословліня Блаженнійшого Владиміра, Митрополиты Кыівского і цілой Украіны, всечеснійший о. Йоан Антонович, митрофорний протоєрей, канцлер перемышльско-новосандецкой єпархіі, о. прот. Юлиян Феленчак, декан саноцкій (Морохів), о. митрат Василий Заброцкій – декан перемышльскій (Кальників), о. митрат Вячеслав Янєль (Клоковичы, Молодовичы), о. прот Андрий Ґрич (Білянка, Ліщыны, Кункова), о. прот. Роман Дубец, декан новосандецкій (Ґорлиці), о. прот. Юрий Мокрауз  (Перемышль), о. прот. Петро Пупчык (Крениця), о. прот. Марко Ґоцко (Команча), о. ігумен Пафнутий, настоятель монашого дому в Высовій, o. ігумен Мойсей  о. Мирослав Цідило (Бортне), о. прот. Владимір Канюк (Ганчова), о. прот. Йоан Плева (Запалів),о. протодіакон Антон Ярий, котрий служыт в саноцкій катедрі уж 21 років. Співал камеральний склад  єпарахіяльного хору “Ірмос” і хористы саноцкого катедрального хору під реґентуром Мариянны Ярой. На конференциі голос мали священникы і почесны гості: старійший член саноцкой парафіі, долголітній дяк, Владимір Марчак, др Лідия Колянчук, проф. Александер Колянчук (Перемышль), Петро Трохановскій.
Конференцию зачал о. Антонович, котрий выголосил обшырный і детальний реферат о істориі єпархіі.
Запрашаме до выслуханя св. Божеской Літургіі і реляциі з конференциі в неділю 10 XI 2013 о 10:00 годині.