Рутенія іде до Перу

Як інформує на своїм сайті Фолклорный ансамбель Рутенія, в днях 1-го аж 13-го марца 2016 року буде ансамбель участный міджінародного фестівалу в югоамерицькій державі Перу.

Окрім танечників і співацькой части ансамблю, супровод Рутенії будуть робити і музиканты з музичной ґрупы Банда, і так само Народной музикы Рутенія.

Ансамбель одходить за море вже в пятніцю 26-го фебруара і через Прагу, Амстердам, Лондон, Сао Паоло прилетить до Лімы, головного міста Перу. Назад ся членове Рутенії вернуть через Мадрід 16-го марца. Окрім фестівалу мають участны можливость видіти памяткы як Макчу Пікчу, озеро Тітікака, Долину кралів, історічны міста і далшы інтересности того краю.

Ансамбель Рутенія минулого року святковав 5-ту річніцю свого заснованя. Є то русиньскый ансамбель діючій в Братіславі, котрый ся замірявать на репрезентованя русиньской народностной меншыны. Названя ансамбель має од історічной назвы теріторії, на котрій жыли Русины (marchia Ruthenorum), што має вказати на то, же молоды люди не стратили інтерес о свою історію.

Як ся пише на сайті ансамблю, Рутенія до Перу іде репрезентовати вшыткых Русинів і зато несе зо собов і русиньскый флаґ.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА